Аҳолини рўйхатга олишда киритилган маълумотлар махфий бўлиб, солиқ ёки бошқа идораларга узатилмайди — Статистика қўмитаси
Онлайн рўйхатга олишда OneID логин ва паролларини учинчи шахсларга бериш қонунчиликка зид экани ва салбий оқибатларга олиб келиши мумкинлиги ҳақида расмий огоҳлантириш берилди.
Айрим ижтимоий тармоқларда рўйхатга олиш саволномасини бошқа шахслар томонидан тўлдириб бериш баҳонасида фуқаролардан шахсий идентификация маълумотлари, жумладан OneID тизимига кириш логин ва пароллари талаб этилаётгани ҳақида хабарлар тарқалмоқда.
Шу муносабат билан таъкидлаб ўтиладики, рўйхатга олиш саволномаси ҳар бир фуқаро томонидан шахсан, мустақил равишда тўлдирилиши шарт. Ўзига ёки оила аъзоларига тегишли шахсий маълумотларни учинчи шахсларга тақдим этиш қонунчилик талабларига зид бўлиб, маълумотлардан ғаразли мақсадларда фойдаланилиши каби салбий оқибатларга олиб келиши мумкин.
Фуқароларга шахсий маълумотлар дахлсизлигини таъминлаш мақсадида онлайн рўйхатдан ўтиш жараёнини ўзлари мустақил амалга ошириш қатъий тавсия этилади.
Онлайн рўйхатдан ўтиш жараёнида саволномага оила аъзолари ҳам киритилган бўлса, уларнинг барчаси аҳолини рўйхатга олиш жараёнидан тўлиқ ўтган ҳисобланади. Бу амалдаги қонунчилик талабларига тўлиқ мос келади.
Ахборот тизими томонидан сертификат фақат битта — асосий респондент номи билан шакллантирилади. Шу боис, ҳар бир оила аъзоси учун алоҳида сертификат автоматик равишда берилмайди.
Бироқ census.stat.uz портали орқали шакллантирилган сертификатнинг қуйи қисмида онлайн рўйхатдан ўтган барча оила аъзоларининг тўлиқ рўйхати акс эттирилади. Ушбу сертификат иш жойлари ёки бошқа ташкилотларга тақдим этиш орқали оила аъзоларининг рўйхатдан ўтганини тасдиқлаш мумкин.
- Саволномада хонадонда амалда яшаб турган барча оила аъзолари ҳақидаги маълумотлар тўлиқ киритилиши лозим.
- Томорқа (ҳовли) ер майдони, ундан фойдаланиш ҳолати, мавжуд чорва ва паррандалар сони ҳақидаги маълумотлар аниқ кўрсатилиши шарт.
- Онлайн рўйхатдан ўтишда доимий прописка манзили эмас, балки амалда яшаб турган манзил кўрсатилади.
Тақдим этилган маълумотлар солиқ ёки бошқа давлат органларига узатилмайди, уларнинг махфийлиги қонунчилик билан кафолатланган.
Рўйхатга олиш ахборот тизими киритилган маълумотларни автоматик тарзда текширади. Хато ёки ноаниқликлар аниқланган тақдирда, 4–28 февраль кунлари маҳалла еттилиги вакиллари томонидан қайта рўйхатга олиш ишлари амалга оширилиши мумкин.
Фуқаролардан саволномани биринчи мартаёқ масъулият билан, тўлиқ ва ишончли маълумотлар асосида тўлдириш сўралади.
