Андижонда цементни таннархидан паст нархда сотган корхона жаримага тортилди

Рақобатни ривожлантириш ва истеъмолчилар ҳуқуқларини ҳимоя қилиш қўмитаси Андижон вилоятидаги Shangfeng-Bridge of Friendship цемент заводига қарши антидемпинг иши қўзғатганди. Қўмита 4,9 миллиард сўм миқдорда молиявий жарима қўллаш бўйича қарор қабул қилди.

 

2024 йилнинг март-июль ойларида биржа савдолари орқали сотилиши керак бўлган жами 122,7 минг тонна цемент маҳсулоти белгиланган талабларга зид равишда тўғридан тўғри шартномалар асосида реализация қилинган.

 

Бунда жами 2,7 минг тонна цемент маҳсулоти ўртача ҳисобланган биржа котировкасидан юқори нархларда тўғридан тўғри реализация қилингани натижасида 81,1 миллион сўм асоссиз равишда даромад олинган ва бошқа цемент ишлаб чиқарувчиларга нисбатан инсофсиз рақобатни содир этгани аниқланди.

 

Мазкур ҳолатлар юзасидан ҳудудий бошқарма Махсус комиссияси томонидан Shangfeng-Bridge of Friendship МЧЖга нисбатан рақобатга зид ҳаракатларни, хусусан рақобатчиларга нисбатан инсофсиз рақобатни амалга оширгани (демпинг ҳаракатлари) ва биржа савдоларини ўтказиш чоғида рақобатни чеклайдиган ҳаракатларни содир этгани сабабли белгиланган тартибида 4,9 миллиард сўм миқдорда молиявий жарима қўллаш бўйича қарор қабул қилинди.

 

Қонун бузилиши ҳолатларини бартараф этиш ва келгусида йўл қўймаслик юзасидан бажарилиши мажбурий бўлган кўрсатмалар берилди.

 

Шунингдек, МЧЖ томонидан юқори ликвидли ва монопол турдаги (цемент) маҳсулотини тўғридан тўғри шартномаларга асосан реализация қилишда қўшилган қиймат солиғи ва фойда солиғини ҳисоблаш бўйича тўпланган ҳужжатлар солиқ органига юборилган.