Андижонда сойдан ёш қизчанинг жасади топилди

Андижон вилояти Жалақудуқ ва Хўжаобод туманлари бўйлаб оққан селдан сўнг бир қизнинг танаси жонсиз ҳолда топилган. Бу ҳақида Андижон вилояти ҳокимлиги ахборот хизмати хабар бермоқда.

 

Қизнинг ёши 5-6 ларда экани тахмин қилинган.

 

Аввалига вилоят ҳокимлиги Жалақудуқ ва Хўжаобод туманлари ҳудудидаги тезкор ўрганишлар давомида ушбу ҳудудларда бу ёшдаги фарзандини йўқотган оила аниқланмаганини маълум қилди.

 

"Бундан келиб чиқиб, ушбу шахс вилоятимиздан ташқари бўлган, тошқин рўй берган бошқа ҳудуддан оқиб келгани тахмин қилинмоқда. Вазият бўйича қўшимча ахборотлар маълум қилинади", — дейилади хабарда.

 

Ҳокимлик матбуот хизматининг кейинги хабарида сойдан топилган жасад қўшни Қирғизистондан оқиб келгани айтилади.

 

"Хўжаобод туманидаги Шаҳрихонсойдан топилган тахминан 5-6 ёшли қизалоқ Ўш шаҳридаги оиладан экани тасдиқланмоқда. Юборилган фотосурат орқали Ўшдаги оила вакили бу қизалоқ унинг ўз оиласидан эканини тасдиқлаган.

 

Ҳозирда оила вакили Хўжаобод тумани сари йўлга чиққанини билдирган. Вилоят ҳокимлиги ва тегишли органлар томонидан мазкур оилани қўллаб-қувватлаш ҳаракатлари ташкил этилди", — дейилади хабарда.

 

Маълумот учун, 14 июль куни Қирғизистоннинг Ўш вилоятида тоғ ва адирликларида кузатилган жала ёмғирлар ёғиши оқибатида Андижон вилоятида кучли сел оқди.

 

Оқбўра сойида оққан кучли сел оқибатида Хўжаобод тумани Ёрқишлоқ қишлоғида битта кўприкни сув оқизиб кетган. Яна битта пиёдалар кўприги қулаб вайрон бўлган.

 

Бу вақтда Қирғизистондаги ижтимоий тармоқларда Ўшдаги қишлоқлардан бирида яшовчи 1980 йилда туғилган аёл 2005, 2014 ва 2018 йилда туғилган қизалоқлари билан оқиб кетгани ҳақида хабар тарқалган.