АҚШ “грин карта” дастурини вақтинча тўхтатди
Қарор Браун университетида содир бўлган отишма билан боғлиқ воқеа ортидан қабул қилинди.
АҚШ ҳукумати Турли миллатларга мансуб иммигрантлар учун яшил карта лотереяси дастурини вақтинча тўхтатишга қарор қилди. Ушбу қарор Президент Доналд Трампнинг кўрсатмаси асосида амалга оширилди.
АҚШ Ички хавфсизлик вазири Кристи Ноэмнинг маълум қилишича, лотерея дастурини тўхтатиш чоралари мавжуд кириш тизими келтириб чиқариши мумкин бўлган потенциал таҳдидлардан ҳимоя қилиш мақсадида зарур бўлган.
Қарор Браун университетида содир бўлган отишма билан боғлиқ воқеа ортидан қабул қилинди. Ҳужум гумонланувчиси Клаудио Невес Валенти Қўшма Штатларга 2017 йилда яшил карта лотереяси орқали келганлиги маълум қилинган. Отишма 13 декабрь куни Род-Айленд штатининг Провиденс шаҳрида содир бўлган бўлиб, икки киши, жумладан ўзбекистонлик талаба ҳалок бўлган, яна тўққиз киши жароҳат олган. Ҳужумчи дастлаб қочиб кетган, бир неча кун ўтгач ўлик ҳолда топилган.
