АҚШ Давлат департаменти Эрон ҳудудида юз бераётган кенг кўламли норозилик намойишлари, интернет ва алоқа чекловлари, шунингдек, жамоат транспорти фаолиятидаги узилишлар фонида Америка фуқароларини мамлакатни тарк этишга чақирди. Бу ҳақда Теҳрондаги АҚШ манфаатларини ифодаловчи расмий манбалар эълон қилган баёнотда маълум қилинди дейди РБС.
Баёнотда АҚШ фуқароларига муқобил алоқа воситаларини олдиндан режалаштириш, имкон бўлса, Эронни Арманистон, Туркия ёки Туркманистон билан қуруқликдаги чегаралар орқали тарк этиш тавсия этилди. Агар мамлакатни тарк этишнинг имкони бўлмаса, фуқароларга уйларида ёки бошқа хавфсиз жойларда бошпана топиш, етарли миқдорда озиқ-овқат, ичимлик суви, дори-дармон ва зарур буюмлар захирасини тайёрлаб қўйиш тавсия қилинди.
Шунингдек, икки фуқароликка эга АҚШ фуқароларига сафар вақтида Эрон паспортидан фойдаланиш маслаҳат берилди. Сабаби, Эрон ҳукумати бундай шахсларнинг АҚШ фуқаролигини тан олмайди.
Баёнотда АҚШ ва Эрон ўртасида дипломатик ва консуллик алоқалари мавжуд эмаслиги, Теҳрондаги АҚШ манфаатлари Швейтсария томонидан ҳимоя қилиниши қайд этилган.
Шу билан бирга, L’Orient Today нашри манбаларига таяниб хабар беришича, Теҳрондаги Франция элчихонасининг дипломатик ёрдам ходимлари норозилик намойишлари сабаб Эронни тарк этган.
Маълумотларга кўра, риалнинг кескин қадрсизланиши, халқаро санкциялар ва Исроил билан боғлиқ кескинлик фонида инфляция қарийб 50 фоизга етган. Бу ҳолат ҳукуматга қарши норозилик намойишларининг ўнлаб шаҳарларга ёйилишига сабаб бўлган. Инсон ҳуқуқлари ташкилотлари маълумотига кўра, норозиликларнинг 16-кунида юзлаб намойишчилар ҳалок бўлган. Расмий Теҳрон эса тартибсизликларда АҚШ ва Исроилни айбламоқда