Исломободга расмий ташрифи чоғида Эроннинг Покистондаги элчиси Реза Амири Могаддам Теҳрон ва Вашингтон ўртасидаги кескин муносабатлар юзасидан муҳим баёнот билан чиқди. Дипломатнинг маълум қилишича, АҚШ президенти Доналд Трамп Эрон томонига мамлакатга ҳарбий ҳужум қилиш ниятида эмаслигини билдирган ҳамда Теҳронни вазминликка чақирган.
Элчининг сўзларига кўра, мазкур маълумотни у тунги соат 1:00 атрофида олган. Хабарда АҚШ раҳбари урушни истамаслиги, шунингдек, Эрондан минтақадаги Америка манфаатлари ва нишонларига қарши ҳаракатлардан тийилишни сўрагани қайд этилган. Ушбу баёнот АҚШнинг Эрон ичидаги норозилик намойишлари фонида билдирган ҳарбий аралашув эҳтимоллари муҳокама қилинаётган бир пайтда янгради.
Ички вазиятга тўхталар экан, Реза Амири Могаддам фуқароларнинг тинч норозилик билдириш ҳуқуқини тан олган ҳолда, ҳукумат намойишчилар билан мулоқот олиб бораётганини таъкидлади. Шу билан бирга, у Ғарб оммавий ахборот воситаларини зўравонликни қўзғатишда айблаб, айрим қуролли гуруҳлар томонидан масжидлар ва жамоат объектларига ҳужумлар уюштирилганини маълум қилди.
Эрон расмийларига кўра, ҳозирда мамлакатдаги вазият тўлиқ назорат остида, норозилик намойишлари эса тўхтаган. Теҳрон Исроил ёки АҚШ томонидан эҳтимолий тажовуз содир этилган тақдирда, минтақадаги уларнинг нишонларига қарши жавоб чораларини кўришга тайёр эканини билдирган.
Шунингдек, Реза Амири Могаддам Покистон ҳукуматига ҳар томонлама қўллаб-қувватлагани учун миннатдорчилик билдириб, 44 йилдан буён санкциялар босими остида яшаётган Эрон учун моддий ёрдамдан кўра мусулмон давлатларининг маънавий ва сиёсий бирдамлиги муҳим эканини алоҳида таъкидлади.