АҚШ вице-президенти Ж.Д.Венс Fox News телеканалига берган интервьюсида президент Доналд Трампнинг «очкўзлиги» ҳақидаги баҳсларга изоҳ берди. Унинг таъкидлашича, Трампнинг қатъий ва манфаатпараст сиёсати Америка халқининг фаровонлиги ҳамда Қўшма Штатлар манфаатларини ҳимоя қилишга қаратилган.
Венснинг сўзларига кўра, АҚШга айнан шундай позицияга эга президент зарур. У Трампнинг ёндашувини Америка етакчисидан кутиладиган табиий сиёсий хулқ-атвор сифатида баҳолади.
“У Америка манфаатларини ҳимоя қилишга очкўз. Бизга Америка халқининг фаровонлиги учун очкўз бўла оладиган президент керак”, — деди вице-президент.
Шу билан бирга, Колумбия президенти Густаво Петро Трамп томонидан билдирилган танқидий фикрларга муносабат билдириб, бундай баёнотларни “қарилик менталитети” билан изоҳлади. Петро АҚШ президенти уни асоссиз равишда айблаганини таъкидлаб, Трампни қўллаб-қувватлаган сайловчиларни кескин танқид қилган.
Аввалроқ, Трампнинг Венесуэладан кейин Колумбияга нисбатан ҳам босим ўтказиши мумкинлиги ҳақидаги баёнотларига жавобан Густаво Петро мамлакатини ҳимоя қилишга тайёр эканини билдирган эди.