АҚШга ноқонуний йўл билан борган 44 нафар Ўзбекистон фуқароси 21 январь куни чартер рейс орқали ватанга қайтарилди. Улар "Дунё" ахборот агентлигига берган интервьюларида Мексика орқали ўтган мураккаб йўллар, сафар давомида дуч келган хавф-хатарлар ва манзилдаги оғир шароитлар ҳақида сўзлаб берди.
Қайтган фуқароларнинг айтишича, сафар бир ойдан ортиқ вақтни олган, ўрмон ва саҳролардан пиёда ўтишга тўғри келган. Кўпчилик танишларининг “осон пул топяпмиз” деган гапларига ишониб йўлга чиққанини, аммо ҳақиқат бутунлай бошқача бўлганини таъкидлаган. Мексикадан кейин ҳам ҳужжат масалалари ва иш топиш деярли имконсиз бўлган.
Айрим мигрантлар АҚШга бориш учун 20 мингдан 30 минг долларгача маблағ сарфлаганини, ҳатто 80 минг доллар тўлаб ҳам мамлакатга кира олмаганлар борлигини айтган. “20 минг доллар пулимни ҳавога совуриб, уч ой қамалиб, депорт олиб, мана қайтиб келяпман”, дейди қайтган фуқаролардан бири. Унинг сўзларига кўра, миграция марказларидаги шароитлар жуда оғир бўлган.
Маълумотларга кўра, ушбу чартер рейс Ўзбекистон ва АҚШ тегишли идоралари ўртасида олиб борилган кўп ойлик ҳамкорлик натижасидир. Бу 11-рейс бўлиб, унинг доирасида қайтарилган ўзбекистонликлар умумий сони қарийб 700 нафарга етди. Расмийлар ноқонуний миграция катта хавф ва йўқотишларга олиб келишини яна бир бор эслатмоқда.