Экология ва иқлим ўзгариши миллий қўмитаси ҳузуридаги Давлат экологик назорат инспекцияси (Экополиция), Бухоро вилояти Экология ва иқлим ўзгариши бош бошқармаси ҳамда тегишли ташкилотлар ҳамкорлигида Бухоро вилояти ҳудудида навбатдаги рейд тадбирлари ўтказилди. Бу ҳақда Экология ва иқлим ўзгариши миллий қўмитаси матбуот хизмати хабар берди.
Рейд давомида Бухоро вилояти Пешку тумани чўл ҳудудида икки нафар шахс томонидан 8 дона кулранг ғоз ҳеч қандай рухсатномасиз ноқонуний овлангани аниқланди. Мазкур ҳолат юзасидан ҳуқуқбузарларга нисбатан ҳайвонот дунёсига етказилган зарар учун 3 миллион 296 минг сўм ундириш ҳамда базавий ҳисоблаш миқдорининг 50 баравари миқдорида жарима белгиланди. Ноқонуний овланган қушлар олиб қўйилиб, тўпланган ҳужжатлар суд органларига юборилди.
Шунингдек, рейд давомида Бухоро шаҳри Марказий бозори автотураргоҳида фуқаро Ф.M. томонидан йўлбарссимон бўғма илон ёрдамида цирк томошаси ўтказилаётгани аниқланган. Текширув жараёнида мазкур ёввойи ҳайвонга оид ҳеч қандай рухсат берувчи ҳужжатлар мавжуд эмаслиги, шунингдек, уни сақлаш ва фойдаланиш талаблари қўпол равишда бузилгани маълум бўлди.
Натижада илон тегишли тартибда олиб қўйилиб, ветеринария кўригидан ўтказилди ҳамда вақтинча сақлаш мақсадида Сомоний боғида ташкил этилган ҳайвонот боғига жойлаштирилди.
Маълумот учун, Ўзбекистон Республикаси Вазирлар Маҳкамасининг 2024 йил 5 ноябрдаги 736-сонли қарорига мувофиқ, 2025 йил 1 январдан бошлаб жисмоний шахсларга ёввойи ҳайвонларни ярим эркин шароитда, сунъий яратилган муҳитда ёки тутқунликда сақлаш тақиқланган. Шунингдек, бундай ҳайвонлардан давлат ва кўчма циркларда томошалар намойиш этиш учун фойдаланишга ҳам рухсат этилмайди.
Мазкур ҳолат юзасидан ҳуқуқбузарга нисбатан Ўзбекистон Республикаси Маъмурий жавобгарлик тўғрисидаги кодексининг 92¹-моддаси 1-қисми билан маъмурий баённома расмийлаштирилиб, иш ҳужжатлари тегишли чоралар кўриш учун суд органларига юборилди.