“Челси” ҳали ўзгаришларга муҳтож

 

Лондоннинг “Челси” клубида ҳаммаси жойида эмас. Бир неча ой олдин Томас Тухел жамоаси янги мавсумда “Манчестер Сити” ва “Ливерпул” билан рақобатлаша оладиган Англияда учинчи кучдек туюларди. Аммо айни кунларда клубда муаммолар бошланди. Айниқса, “Арсенал”га учралган 4:0 ҳисобидаги мағлубият Томас Тухелнинг режаларини ўзгартириб юборди. “Арсенал” билан ўйиндан сўнг ташкил этилган матбуот анжуманида Тухел ҳали қилинадиган ишлар талай эканини таъкидлади:

 

“Мен жамоамнинг ўйинидан умуман қониқмадим. Биз мағлубиятга лойиқмиз. Бу адолатли бўлди. Чунки биз етарли даражада яхши ўйнамадик. “Арсенал” ҳар бир баҳсга жисмоний ва руҳий жиҳатдан анча яхши тайёрлангани мени хавотирга солмоқда”.

 

 

Мураббий клубда дарҳол янги ўзгаришларни амалга ошириш кераклиги ҳақида гапирган. Сабаби, бу ҳолат кейинги мавсумда яхши натижалар кўрсатишга имкон бермаслиги мумкин:

 

“Менимча, бу ўйинда “Арсенал” ўзининг энг яхши таркиби билан ўйнади. Улар Премьер-лиганинг янги мавсумида совринли ўринлар учун курашишга ҳаракат қилади. Лекин, бугунги баҳсда биз кучли таркиб билан ўйнамадик. Бироқ бошқа омиллар ҳам ташвишга солмоқда. “Арсенал” шунчалик фидойилик ва жисмоний тайёргарлик даражасида ўйнадики, биз унга тенглаша олмадик. Психологик омил ҳам ўз ролини ўйнади ва бизнинг заифлигимиз сезилиб қолди. Чунки кўплаб футболчиларимиз кетиш ҳақида ўйлашмоқда ва бошқа вариантларни излашмоқда. Менимча бу муаммо ҳақида жиддий ўйлашимиз керак. Бу ўйин менинг қарашларимга ҳеч қандай таъсир кўрсатмади. Мен хато қилишни афзал кўраман ва жамоанинг ривожи учун бор имкониятимни ишга соламан. Ўтган мавсум бир қанча муаммолар ичида қолдик. Ўшанда бизга нисбатан санкциялар қўлланилганди, баъзи ўйинчилар кетишди, бошқалари ҳозир ҳам шуни ҳаракатини қилишмоқда. Шу боис, яхши ўйинчиларни зудлик билан қидиряпмиз”.

 

Нега Тухел “Челси” таркибидан норози?

 

Мураббийнинг хавотирларини тушуниш мумкин. “Челси” ёзда қанот ҳимоячиси Раҳим Стерлинг ва ҳимоячи Калиду Кулибалини сотиб олди. Бундан ташқари ўтган мавсумда “Кристал Пелас”да ижара асосида ўзини яхши кўрсатган иқтидорли ярим ҳимоячи Конор Галлагер клубга қайтиб келди.

 

Аммо лондонликлар бир қанча йўқотишларга учради. Ромелу Лукаку, Антонио Рюдигер ва Андреас Кристенсен шулар жумласидан. Жамоага янги қўшилган ўйинчилар юқорида санаб ўтилган футболчиларнинг ўрнини тўлдиришгани йўқ. Лукаку “Челси”га қайтганидан сўнг кутилган натижа бермади. Шундан сўнг у “Интер”га ижара асосида ўтди. “Челси”да ҳозирда унинг ўрнини босадиган ҳеч ким йўқ. Рюдигер ва Кристенсен жамоа билан шартномалари тугагач текинга кетишди. Антонио “Реал”га ўтган бўлса, Андреас “Барселона” футболчисига айланди.

 

Лондонликларнинг сардори Сезар Азпиликуэта ҳам “Барселона”га ўтишга яқин турибди. Ҳимоячининг шартномаси кейинги ёзда тугайди. Испан жамоаси Аспиликуэтани 5 миллион еврога  сотиб олишга рози бўлган. Аммо Тухел ўз футболчиси билан хайрлашмоқчи эмас.

 

“Челси” ҳимоядаги йўқотишлардан кейин бу чизиқни тўлдириш йўлини изламоқда. Клуб бир қанча футболчилар билан музокаралар ўтказмоқда.

 

“Аристократлар” “ПСЖ”дан Преснел Кимпембе ва “Севиля”дан Жюл Кундени қўлга киритишга уриниб кўриши мумкин. Агар Томас Тухел ўз режаларини амалга оширолмаса, кейинги мавсум жамоа учун омадсиз ўтиш эҳтимоли мавжуд.

Жамшидбек Амиров