“Челси”нинг собиқ футболчиси зилзила оқибатида вафот этди
Бу ҳақда футболчининг агенти маълум қилди.
Туркиянинг “Ҳатайспор” клуби ҳужумчиси, аввалроқ Лондоннинг “Челси” клубида ўйнаган Кристиан Атсу Туркияда вайроналар остидан ўлик ҳолда топилди. Бу ҳақда футболчининг агенти Мурат Узунмеҳмет ўзининг twitter саҳифасида маълум қилди.
Эслатиб ўтамиз, ўтган ҳафта Туркияда содир бўлган даҳшатли зилзилалар бошланганидан бери Атсу қаердалиги ва аҳволи ҳақида ҳеч нарса маълум эмас эди. Аввалроқ “Ҳатайспор” вакиллари футболчи фожиа арафасида турк клубини тарк этмоқчи бўлганини маълум қилганди.
Атсу 31 ёшида вафот этди. Гана терма жамоаси футболчиси фаолияти давомида Англиянинг “Челси”, “Эвертон”, “Нюкасл” ва “Борнмут”, Португалиянинг “Порту”, Испаниянинг “Малага” ва бошқа клубларида ўйнаган. Атсу Туркиянинг “Ҳатайспор” клубига 2022 йилнинг сентябрида келиб қўшилган эди.
