Янги Тошкент аэропорти қурилиши муносабати билан 7 та қабристон кўчирилади
Уларнинг 2 таси Қуйи Чирчиқ, 5 таси Ўрта Чирчиқ туманида жойлашган.
Тошкент вилояти ҳокимининг тегишли қарорига кўра, Қуйи Чирчиқ туманидаги Сергели маҳалласида жойлашган «Сергели болалар» ва «Корейс» қабристонлари кўчирилади.
Ўрта Чирчиқ туманидаги Янгийўл маҳалласида жойлашган «Сувон бағиш», «Қудойқул» мусулмон қабристонлари, «Қудойқул» ва «Сариқтепа» корейс қабристонлари ҳамда «Борис» рус христиан қабристони ҳам кўчирилиши белгиланган.
Қайд этилишича, мазкур қабристонларда дафн ишлари узоқ йиллар аввал тўхтатилган. Ўзбекистон мусулмонлари идораси 2026 йил 10 апрелда берган хулосада марҳумларнинг жасадлари тупроққа айланган бўлиши эҳтимоли мавжуд қабристон ҳудудларидан белгиланган тартибда фойдаланиш мумкинлигини билдирган.
Қабрларни очиш вақтида суяк қолдиқлари аниқланган тақдирда, улар эҳтиёткорлик билан йиғилиб, бошқа қабристонларга қайта дафн этилади.
Бундан ташқари, қарорга кўра, «Сергели болалар» қабристонидан эксгумация қилинган қабрлар «Шардара», «Корейс» қабристонидан чиқарилган қолдиқлар эса Сергели маҳалласидаги рус-корейс қабристонига кўчирилади.
«Сувон бағиш» ва «Қудойқул» мусулмон қабристонларидан эксгумация қилинган қабрлар Янгийўл маҳалласидаги «Зайнаб она» қабристонига қайта дафн этилади.
«Қудойқул» ва «Сариқтепа» корейс қабристонлари ҳамда «Борис» рус христиан қабристонидан эксгумация қилинган қолдиқлар эса Тараққиёт маҳалласидаги корейс қабристонига кўчирилади.
Қайта дафн қилиш ишлари диний урф-одатларга мувофиқ, шунингдек, санитария-эпидемиология, экологик, архитектура ва жамоатчилик талабларига риоя этилган ҳолда амалга оширилиши белгиланган.
