Давоматни сунъий интеллект назорат қилади: Тошкентдаги 26 та мактабда янги тизим синовдан ўтказилмоқда

Тошкент шаҳар ҳокимлигининг Вазиятлар марказида пойтахт мактабларида давоматни назорат қилиш ва дарс қолдириш ҳолатларини ўз вақтида аниқлаш масалаларига бағишланган йиғилиш ўтказилди. Унда “SI Davomat” тизимининг ишлаш механизми ва Сергели туманидаги синов натижалари муҳокама қилинган.

 

Тизим орқали ўқувчи сабабсиз дарс қолдирган тақдирда, унинг ота-онасига SMS-хабарнома юборилади. Мазкур маълумот мактаб директори, профилактика инспектори, Миллий гвардия ходими ҳамда маҳалла вакилларига ҳам автоматик етказилади.

 

“SI Davomat”нинг имкониятлари фақат давоматни қайд этиш билан чекланмайди. Тизимдаги нутқни таҳлил қилувчи модуллар орқали ўқувчиларнинг дарсдаги фаоллиги ва мавзуга қизиқиши, шунингдек, ўқитувчининг дарсни олиб бориш маҳорати ва машғулот сифати каби кўрсаткичларни таҳлил қилиш имконияти кўзда тутилган.

 

Ушбу маълумотлар методистлар томонидан ўрганилиб, баҳолаб борилади. Таҳлил натижаларига кўра таълим сифатини ошириш, шунингдек, ўқитувчи ва ўқувчиларни рағбатлантириш ёки тегишли чораларни қўллаш механизмларини жорий этиш режалаштирилмоқда.

 

Ҳозирда тизим Сергели туманидаги 26 та мактабда синовдан ўтказилмоқда. Мазкур мактабларда жами 446 та смарт камера ўрнатилган.

 

“SI Davomat” “ERP Maktab” ҳамда Соғлиқни сақлаш вазирлигининг DMED тизимлари билан интеграция қилинган. Бу орқали ўқувчининг касаллиги сабабли дарсга келмагани билан сабабсиз дарс қолдирган ҳолатларни фарқлаш имконияти яратилади.

 

Шунингдек, мактаблар давомат кўрсаткичларига қараб “яшил”, “сариқ” ва “қизил” тоифаларга ажратилади.

 

Сергели туманидаги синов натижалари асосида “SI Davomat” тизимини Тошкент шаҳридаги бошқа умумтаълим мактабларида ҳам босқичма-босқич жорий этиш режалаштирилмоқда.