Синдоров — Карлсен: бугун шахмат оламида катта тўқнашув
Синдоров етакчилигидаги “FYERS American Gambits” жамоаси бугун Магнус Карлсен сардорлигидаги “Alpine APL Pipers”га қарши баҳс олиб боради.
Бугун, 7 сентябрь куни Ҳиндистоннинг Бенгалуру шаҳрида шахмат бўйича жамоалар ўртасидаги “Tech Mahindra Global Chess League” турнири доирасида Жавоҳир Синдоров Магнус Карлсенга қарши дона суради.
Синдоров етакчилигидаги “FYERS American Gambits” жамоаси мусобақанинг учинчи кунида Магнус Карлсен сардорлигидаги “Alpine APL Pipers” жамоасига қарши баҳс олиб боради. Мазкур учрашувда Синдоров жаҳон шахматининг етакчи вакилларидан бири Магнус Карлсен билан куч синашади.
“FYERS American Gambits” жамоаси турнирнинг дастлабки икки кунида “PBG Alaskan Knights”ни 10:4, “Triveni Continental Kings”ни эса 14:5 ҳисобида мағлуб этган.
Жамоа кечаги баҳсда Ян Непомнящий сардорлигидаги “Ganges Grandmasters”га 7:9 ҳисобида имкониятни бой берди. Шунга қарамай, “FYERS American Gambits” 31 очко ва 6 жамоавий очко билан турнир жадвалида пешқадамликни сақлаб турибди.
“Ganges Grandmasters” 25 очко ва 6 жамоавий очко билан иккинчи, “Alpine APL Pipers” эса 21 очко ва 6 жамоавий очко билан кейинги ўринда бормоқда.
Умумий мукофот жамғармаси 1 миллион АҚШ долларини ташкил этадиган “Tech Mahindra Global Chess League” турнири 12 сентябрга қадар давом этади.
