Электр таъминоти корхонаси ходими калтакланган — қонун нима дейди?
Расул Кушербаев электрчилар ваколатлари ва фуқароларнинг ҳуқуқлари бўйича муҳим тушунтириш берди.
Ижтимоий тармоқларда электр таъминоти корхонаси ходими калтаклангани ҳақидаги хабарлар кенг муҳокамаларга сабаб бўлмоқда. Ушбу ҳолат юзасидан Расул Кушербаев ўзининг ижтимоий тармоқдаги саҳифасида амалдаги қонунчилик нормаларига эътибор қаратди.
Унинг таъкидлашича, Вазирлар Маҳкамасининг 319-сон қарорига мувофиқ, электр таъминоти ходимлари фаолияти қатъий тартиблар билан чекланган. Жумладан, агар истеъмолчи ходимни ҳудудга киритмаса, электр энергияси фақат асосий уланиш нуқтасидан, яъни турар жой ичига кирмаган ҳолда узилиши шарт.
Шунингдек, электр ҳисоблагичини текшириш фақат ходимнинг шахсий гувоҳномаси асосида амалга оширилади. Бунда фуқароларнинг турар жой дахлсизлиги бузилмаслиги лозимлиги алоҳида қайд этилган.
Расул Кушербаев Конституцияга кўра турар жой дахлсиз экани, ҳеч бир мансабдор шахс ёки хизмат кўрсатувчи ходим куч ишлатиш ёки ноқонуний равишда уйга киришга ҳақли эмаслигини таъкидлади. Мазкур ҳолатлар юзасидан масъул идоралар томонидан қонуний баҳо берилиши зарурлиги қайд этилди.
