Билдирилишича, 7 октябрь куннинг иккинчи қисмидан бошлаб, вазир қабулхонасининг +998712311441 рақамига 8 октябрь соат 20:30 га қадар вазирлик қабулхонасига жами 1232 та қўнғироқ бўлган.
Уларнинг 131 тасига жавоб берилган. Шундан 31 та қўнғироқ қуёш панели ўрнатишга мажбурланаётганини айтган фуқаролардан тушган бўлиб, уларнинг 14 таси бу ҳодиса бир неча кун аввал бўлганини билдирган.
Уларнинг 6 нафари Энергетика вазирлигининг “Қуёш панелига мажбурлаш йўқ” номли материалини асос қилиб, бугунги кунда электр энергиясини ёқтириб олишганини маълум қилган, 8 нафар мурожаатчи эса қуёш панели қўйганини, бугунги кунда электр энергияси мавжудлигини, аммо бунга мажбурланганидан норозилигини айтган.
17 та қўнғироқ эгаси бугунги кунда бу борада реал муаммога эга эканини маълум қилган. Вазирлик ушбу мурожаатларни ўрганиб, қуёш панели ўрнатмагани учун электр энергиясидан узиб қўйилган тадбиркорларнинг электр энергиясини улатган.
Икки кун мобайнида Тошкентнинг Сергели, Яшнобод, Юнусобод ҳамда Бектемир туманлари, Сирдарёнинг Боёвут, Сурхондарёнинг Бандихон, Фарғонанинг Бувайда, Тошкент вилоятининг Қуйи Чирчиқ туманларидаги бир қатор тадбиркорлар электр энергиясига қайта уланди.
Шу боис, вазирлик 9 октябрдан бошлаб мурожаатлар қўшимча +99871-231-16-61 (ички 7046, 7037 ва 7057) рақамлари орқали ҳам қабул қилинишини билдирилган.