Сўнгги хабарларга кўра, Илон Маскнинг Starlink сунъий йўлдош интернети Эронда фаоллаштирилган. Мамлакатда интернет деярли тўлиқ узиб қўйилган бир пайтда бу ҳолат норозилик намойишчилари томонидан катта қўллаб-қувватлаш билан кутиб олинди. Ижтимоий тармоқларда айрим фойдаланувчилар АҚШ президенти Доналд Трамп ва Илон Маскка интернет эркинлиги учун миннатдорчилик билдирган. Бу ҳақда Agenzia Nova нашри хабар бермоқда.
Маълумотларга кўра, Илон Маск Starlink хизматини Эрон бўйлаб бепул фаоллаштирган. Ушбу тизим ер усти инфратузилмасига боғлиқ бўлмаган интернет алоқасини таъминлайди. Бироқ ундан фойдаланиш учун махсус сунъий йўлдош антенналари, роутер ва барқарор электр манбаи талаб этилади. Айрим тасдиқланмаган хабарларга кўра, Starlink қурилмалари норозиликлар бошланишидан аввал ноқонуний йўллар билан Эронга олиб кирилган.
Айни пайтда Эронда норозилик намойишлари 13 кундан бери давом этмоқда. Ҳукумат интернетни ўчириб қўйган, расмийлар эса тартибсизликларда АҚШ ва Исроилни айбламоқда. Ҳуқуқ ҳимоячиларининг маълумотига кўра, ҳозиргача камида 45 киши ҳалок бўлган. Намойишларда хавфсизлик кучлари билан кескин тўқнашувлар қайд этилмоқда.
Эрон давлат телевидениеси айрим ҳудудларда намойишчилар қуролланган ҳолда чиқиш қилганини кўрсатган бўлса, мустақил манбалар тинч аҳолига қарши куч ишлатилаётганини хабар қилмоқда. Айрим шаҳарларда автомобиллар ва бинолар ёқиб юборилган, халқаро рейслар вақтинча бекор қилинган.
Эрон Олий раҳбари Али Хоманай чиқиш қилиб, намойишчиларни «хорижий кучлар ёлланмалари» деб атади ва АҚШ президенти Доналд Трампни беқарорликда айблади. Расмийлар норозиликларни «террористик ҳаракатлар» деб баҳоламоқда. Прокуратура эса намойишчиларга нисбатан «моҳареба» (давлатга қарши уруш) моддаси қўлланилиши мумкинлигини билдирди, бу эса ўлим жазоси билан жазоланади.
Шу билан бирга, Европа Иттифоқи ва БМТ Эрон ҳукуматини куч ишлатишни тўхтатишга ва тинч намойишларга рухсат беришга чақирди. Европа Иттифоқи ташқи сиёсат раҳбари Кая Каллас интернетни ўчириш ва зўравонликни «қўрқувдаги режим белгиси» деб атади.
Айни дамда Эрондаги вазият кескинлигича қолмоқда. Starlink’нинг фаоллаштирилиши эса ахборот блокадасини четлаб ўтишда муҳим восита сифатида баҳоланмоқда.