Фарғонада Captiva тоғдан қулаб тушди: ҳайдовчи вафот этди
Ҳайдовчи қор ва муз билан қопланган тоғ йўлида бошқарувни йўқотган.
Фарғона вилоятида содир бўлган йўл-транспорт ҳодисаси оқибатида бир киши ҳалок бўлди. Вилоят ИИБ маълумотига кўра, ҳодиса 2026 йил 19 январь куни соат 21:00 атрофида Фарғона тумани «Ёрдон» МФЙ ҳудудида жойлашган тоғли ҳудудда қайд этилган.
Маълум қилинишича, 1981 йилда туғилган A.A. бошқарувидаги Captiva русумли автомобиль транспорт ҳаракати учун мўлжалланмаган кичик дарадаги тоғ йўлида ҳаракатланиб кетаётган вақтида йўлнинг қор ва муз билан қоплангани сабабли бошқарувни йўқотган. Натижада автомобиль ағдарилиб, пастга қулаб тушган.
Ҳайдовчи оғир тан жароҳати — ёпиқ бош мия шикасти ва кома ҳолати билан шифохонага ётқизилган. Шифокорлар томонидан кўрсатилган барча тиббий ёрдам ва реанимация чораларига қарамай, жабрланувчини сақлаб қолишнинг имкони бўлмаган.
