Фарғонада Қишлоқ хўжалиги бошқармаси мутахассиси 50 минг доллар пора билан ушланди
У таниши билан иссиқхона учун ажратилган ер майдонини ноқонуний равишда уй-жой қуриш учун ер майдони олиб бериш эвазига 400 минг АҚШ доллари талаб қилган.
Фарғона вилоятининг Боғдод туманида ер муносабатлари билан боғлиқ йирик ноқонуний ҳолат аниқланди. Бу ҳақда ДХХ Zamon.uzga хабар берди.
Маълум бўлишича, 1984 йилда туғилган, муқаддам судланган фуқаро маҳаллий тадбиркорга кўп қаватли уй-жой қуриш учун ер майдони олиб беришда мансабдор танишлари орқали ёрдам беришини ваъда қилган.
Хусусан, у 2020 йилда бошқа бир фуқарога кам таъминланган ва ишсиз ёшларни иш билан таъминлаш мақсадида иссиқхона ташкил этиш учун ажратилган 29 гектар ер майдонининг 5 гектар қисмини тоифасини ўзгартириб, уй-жой қуриш учун расмийлаштириб бериш эвазига 400 минг АҚШ доллари талаб қилган.
Давлат хавфсизлик хизмати, Иқтисодий жиноятларга қарши курашиш департаменти ҳамда Ички ишлар бошқармаси ходимлари ҳамкорлигида ўтказилган тезкор тадбир давомида ушбу шахс олдиндан 50 минг АҚШ доллари олаётган вақтида ашёвий далиллар билан қўлга олинди.
Тезкор тадбир давом эттирилиб, унинг мансабдор таниши ҳисобланган Фарғона вилояти Қишлоқ хўжалиги бошқармасининг бош мутахассиси ҳам мазкур 50 минг АҚШ долларини олаётган вақтида ушланди.
Ҳозирда мазкур шахсларга нисбатан Жиноят кодексининг 168-моддаси 4-қисми «а» банди ҳамда 28, 211-моддаси 3-қисми «а» бандлари билан жиноят иши қўзғатилиб, «қамоқ» эҳтиёт чораси қўлланилди.
Айни пайтда тергов ҳаракатлари олиб борилмоқда.
