Ижтимоий тармоқларда “Humans” мобил иловасига бириктирилган банк карталаридан рухсатсиз маблағлар ечиб олингани ҳақида хабарлар тарқалмоқда. Мазкур ҳолат бўйича Марказий банк дарҳол чоралар кўриб, тезкор текширув жараёнларини бошлаганини маълум қилди.
Маълумки, “Humans companies” АЖ ҳамда “Octagram” АЖ ўртасида 2025 йил 10 апрелда тузилган шартнома асосида “Humans” мобил иловаси орқали мижозларга тўлов ва P2P пул ўтказмалари хизматлари кўрсатилган.
Шу билан бирга, Тошкент туманлараро иқтисодий судининг 14 октябрдаги қарори билан “Humans” МЧЖ банкрот деб топилган ва ушбу корхонанинг фаолияти 2025 йил 4 ноябрь куни тугатилган. “Humans” МЧЖнинг ягона муассиси — “Humans companies” АЖ ҳисобланади.
2025 йил 8 декабрь куни соат тахминан 08:30 да фуқаролардан “Humans” иловаси орқали карталардан маблағлар рухсатисиз ечиб олингани ҳақида мурожаатлар келиб тушди. Марказий банк ҳолат бўйича “Octagram” АЖ билан боғланиб, хавфсизлик талабларига риоя этилишини ва эҳтимолий заифликларни бартараф этиш мақсадида P2P хизматларини дарҳол тўхтатиш бўйича кўрсатма берди.
9 декабрь ҳолатига кўра, “Humans” мобил иловаси орқали “Octagram” АЖ томонидан амалга оширилаётган барча тўлов хизматлари вақтинча тўхтатилган.
Айни вақтда:
- Uzcard ва Ҳумо карталари орқали тўлов ва ўтказмалар одатий тартибда ишламоқда;
- Карталардан бошқа банк ва тўлов ташкилотлари иловаларида фойдаланиш имконияти сақланиб қолган;
- Барча шубҳали транзакциялар, техник жараёнлар ва платформалар ўртасидаги амалий ҳамкорлик бўйича тезкор текширув ишлари давом этмоқда.
Натижалар юзасидан қўшимча расмий ахборот тақдим этилади.