Илон Маск Трамп маъмуриятини тарк этмоқда
У Трампга раҳмат айтиб, фаолияти якунига етганини билдирган.
Америкалик миллиардер, тадбиркор ва АҚШ Ҳукумат самарадорлиги департаменти (DOGE) раҳбари Илон Маск ўзининг ваколат муддати якунига етаётганини билдириб, президент Доналд Трампга миннатдорчилик изҳор қилди.
“Давлат ресурсларининг ортиқча сарф-харажатларига қарши курашиш имкониятини бергани учун президент Трампдан миннатдорман. DOGE ўз миссиясини давом эттиради ва давлат бошқарувининг ажралмас қисмига айланади”, — деб ёзди Маск Х (аввалги Твиттер) ижтимоий тармоғидаги саҳифасида.
Маск Трамп президентлик лавозимига келганидан сўнг ушбу лавозимга тайинланган эди. Ушбу мақом унга йилига 130 кун федерал ҳукуматга хизмат қилиш имконини берган. Бу муддат 20 январь – инаугурация кунидан бошлаб ҳисоблаб, май ойининг охирида ниҳоясига етади.
Маск аввалроқ CBS телеканалига берган интервьюсида Трампнинг “катта ва чиройли” солиқ ва буджет қонунидан ҳафсаласи пир бўлганини тан олган эди. Унга кўра, бу қонун давлат харажатларини қисқартириш борасидаги ҳаракатларга зарар етказади ва буджет тақчиллигини чуқурлаштиради.
Реутерс манбаларига кўра, Маск истеъфоси олдидан Трамп билан шахсан учрашмаган. Қарор эса "энг юқори даражада" қабул қилинган.
Апрель ойида эса Маск DOGE фаолиятига фақат ҳафтасига бир-икки кун вақт ажратиб, асосий эътиборни ўз компанияларига қаратмоқчи эканини билдирган эди.
