Иордания подшоҳи Ўзбекистонга давлат ташрифи билан келади
Самарқандда сиёсий ва иқтисодий ҳамкорлик масалалари муҳокама қилинади.
Иордания подшоҳи Абдулла II ибн ал-Ҳусайн 25–26 август кунлари расмий давлат ташрифи билан Ўзбекистонга ташриф буюради. Бу ташриф Ўзбекистон Республикаси Президенти Шавкат Мирзиёевнинг таклифига биноан амалга оширилмоқда, деб хабар беради Президент матбуот хизмати.
Ташрифнинг асосий тадбирлари Самарқанд шаҳрида бўлиб ўтади. Томонлар сиёсий, савдо-иқтисодий ва инвестициявий соҳалардаги ҳамкорликни ривожлантириш, шунингдек кимё, фармацевтика, қишлоқ хўжалиги, тўқимачилик, кончилик ва бошқа тармоқларда қўшма лойиҳаларни йўлга қўйиш масалаларини муҳокама қилади.
Шунингдек, давлат раҳбарлари халқаро ва минтақавий сиёсатнинг долзарб масалалари бўйича фикр алмашади. Музокаралар якунида икки томонлама ҳужжатлар ва битимлар тўплами имзоланиши режалаштирилган.
