U-17 футбол бўйича Жаҳон чемпионатининг нимчорак финал босқичида Италия терма жамоасидан (2:3) мағлубиятга учраган учрашувдан сўнг, Ўзбекистон U-17 терма жамоаси бош мураббийи Исломбек Исмоилов жамоа билан фаолиятини якунлаганини маълум қилди.
Исмоиловнинг айтишича, U-17 терма жамоаси учун Жаҳон чемпионати ушбу ёш тоифасидаги сўнгги босқич бўлиб, жамоа бугунги натижа билан ўз фаолиятини расман тугатди. Шу муносабат билан мураббийлар штаби, футболчилар ва техник ходимлар терма жамоа таркибидан кетишди.
“Бугун биз Жаҳон чемпионатидаги иштирокимизни якунладик. Шу билан бирга, 3 йил давомида юрагим билан хизмат қилган U-17 терма жамоамизнинг ҳам фаолияти ниҳоясига етди”, — деб ёзди Исмоилов ўзининг расмий саҳифасида.
Шунингдек, мураббий учрашув давомида юзага келган айрим вазиятларга изоҳ берар экан, футболчиларнинг майдонда провокацияга берилиб қолганини эслатиб ўтиб, ўйин олдидан берилган кўрсатмалар қайта-қайта таъкидланганини, бироқ айрим футболчилар барибир бунга амал қилмаганини айтди.
Унинг таъкидлашича, профессионаллик талаблари асосида берилган огоҳлантиришларга қарамай, айрим футболчиларнинг ҳиссиётларга берилиши жамоадошларини қийин аҳволга солиши мумкин.
Бундан ташқари, мураббий ўйинда бир неча футболчиларнинг сирпаниб кетгани бўйича саволларга жавоб берди. Исмоилов бунга айрим футболчиларнинг нотўғри турдаги — пластик тишли бутсалардан фойдалангани сабаб бўлганини маълум қилди.
“Ҳар хил майдон шароити учун футболчиларда камида 2–3 турдаги бутса бўлиши кераклигини доимо уқтириб келганмиз. Бунга қарамай, айрим футболчилар буларга амал қилмаган. Футболда майда деталь бўлмайди”, — деди Исмоилов.
U-17 жамоасининг янги авлоди 2026 йилдан бошлаб шакллантирилади ва у ҳозирда Сергей Чигодаев бошчилигидаги U-16 терма жамоаси асосида тузилади.