Ўзбекистон миллий терма жамоаси Габонни 3:1 ҳисобида мағлуб этди

Тошкентда Ўзбекистон, Габон, Венесуэла ҳамда Тринидад ва Тобаго терма жамоалари иштирокидаги FIFA Series халқаро турнирига старт берилди.

 

Мусобақанинг илк турида Ўзбекистон миллий терма жамоаси Габон терма жамоасига қарши майдонга тушди.

 

“Бунёдкор” стадионида бўлиб ўтган учрашув икки жамоанинг фаол ҳужумлари билан бошланди. Ўйиннинг 6-дақиқасида Габон футболчиси Тедди Аверлант ҳисобни очди.

 

14-дақиқада Ўзбекистон терма жамоаси сардори Элдор Шомуродов Азиз Ғаниевнинг аниқ узатмасидан сўнг ҳисобни тенглаштирди. Биринчи бўлим якунига яқин эса вакилларимиз яна бир гол уришга муваффақ бўлди. Отабек Шукуровнинг узатмасидан кейин Остон Ўрунов қулай вазиятдан фойдаланиб, жамоасини олдинга олиб чиқди.

 

Иккинчи бўлим ҳам муросасиз курашлар остида давом этди. 59-дақиқада терма жамоа сафида дебют қилган Жаҳонгир Ўрозов бош билан гол уриб, ҳисобни янада мустаҳкамлади.

 

Учрашувнинг сўнгги дақиқаларида, 90+3-дақиқада Алишер Одилов яна бир гол муаллифига айланди.

 

Шу тариқа Ўзбекистон миллий терма жамоаси учрашувни 3:1 ҳисобида ўз фойдасига ҳал қилиб, халқаро турнирни ишончли ғалаба билан бошлади.

 

Маълумот учун, гуруҳдаги яна бир учрашувда Венесуэла терма жамоаси Тринидад ва Тобаго устидан 4:1 ҳисобида ғалаба қозонди.

 

Ўзбекистон миллий терма жамоаси навбатдаги баҳсни 30 март куни Венесуэла терма жамоасига қарши ўтказади. Учрашув Тошкент шаҳридаги “Бунёдкор” стадионида бўлиб ўтади ва соат 19:00 да бошланиши режалаштирилган.