2025 йил якунларига кўра, Исроил давлатлар ўртасидаги глобал обрў-эътибор рейтингида энг қуйи поғонани эгаллади. Бу ҳақда мамлакатларнинг халқаро имижини баҳоловчи Nation Brands Index тадқиқоти маълумотларида қайд этилган.
Ҳисоботда таъкидланишича, бу кўрсаткич Исроил учун сўнгги 20 йил ичидаги энг паст натижа ҳисобланади. Рейтингда давлатларнинг туризм салоҳияти, аҳолиси, маданий имижи, иммиграция жозибадорлиги, экспорт маҳсулотлари ва бошқарув тизимига бўлган ишонч даражаси баҳоланган.
Тадқиқот натижаларига кўра, Исроилга нисбатан салбий муносабатлар нафақат ҳукумат сиёсати, балки мамлакат фуқароларига бўлган қарашлар даражасида ҳам кучайган. Бунга асосий сабаб сифатида Ғазо сектори ва Қуддусдаги ҳарбий можаролар кўрсатилган.
Шунингдек, Исроил маҳсулотлари ва экспортига бўлган ишонч пасайгани қайд этилиб, халқаро бозорларда “Made in Israel” белгиси остидаги маҳсулотларга нисбатан бойкот кайфияти сақланиб қолаётгани билдирилган.
Маълумотларга кўра, 2023 йил октябридан буён Ғазо ҳудудида юз берган ҳарбий ҳаракатлар оқибатида 71 мингдан ортиқ фаластинлик ҳалок бўлган. Ушбу ҳолатлар фонида Исроилга нисбатан салбий фикрлар фақат Араб ва мусулмон давлатларида эмас, балки Европа ҳамда Шарқий Осиё мамлакатларида ҳам кенгайиб бормоқда.
Pev Research ва YouGov томонидан ўтказилган сўнгги сўровномалар натижаларига кўра, 2025 йилда АҚШда аҳолининг 53 фоизи Исроилга салбий баҳо берган. Европада эса Буюк Британия, Франция, Германия, Дания, Испания ва Италияда респондентларнинг аксарияти Исроилга нисбатан танқидий муносабат билдирган. Айниқса, ёшлар ва Ғарбий Европа мамлакатларида ижобий қарашларнинг камайиши Исроилнинг халқаро обрўси ва иқтисодий истиқболларига жиддий таҳдид сифатида баҳоланмоқда.