Пентагон Украинага Исроил армияси омборларида жойлашган 155 мм.ли артиллерия снарядларини етказиб бермоқда. Бу ҳақда америкалик ва исроиллик амалдорларга таяниб The New York Times хабар берди.
Унинг маълумотларига кўра, Қўшма Штатлар 1970 йилларда Араб-Исроил урушидан кейин Америка ҳудудида тузилган омборлардан ўқ-дори етказиб бермоқда. 2022 йилда Вашингтон ва Тель-Авив Украинага 300 минг снаряд бериш бўйича келишувга эришган. Уларнинг ярми аллақачон Европада экани айтилмоқда.
2022 йил февралида Украина Исроилдан "Темир гумбаз" ҳаво ҳужумига қарши мудофаа тизимларини сўраганди. Ўтган йилнинг октябрида Исроил мудофаа вазири Бени Ганц унинг давлати Киевга қурол сотмагани ва сотмаслигини маълум қилган.
Тель-Авив Россиянинг Сурияда ўз манфаатларига кучли зарба беришидан хавотирда. Шу билан бирга, айрим манбалар Исроилнинг АҚШ босими остида Украинага бир неча миллион долларлик стратегик материаллар етказиб берганини таъкидлаган.