«Жартепа» чегара постида вақтинчалик чеклов ўрнатилди
Мазкур пост 12 кунга ҳаракат учун ёпилади.
«Жартепа» божхона пости орқали фуқаролар ва транспорт воситаларининг ҳаракатланишига вақтинчалик чеклов жорий этилди. Бу ҳақда Самарқанд вилояти божхона бошқармаси ахборот хизмати маълум қилди.
Қайд этилишича, йўловчиларга янада қулайлик яратиш мақсадида «Жартепа» чегара божхона постида жойлашган биноларни капитал таъмирлаш ва ҳудудда ободонлаштириш ишлари олиб борилаётганлиги сабабли 2022 йилнинг 5-16 сентябрь кунлари фуқаролар ва транспорт воситаларининг ҳаракатланишларига вақтинчалик чеклов жорий қилинади.
Мазкур чеклов қуйидаги ҳолатларда тадбиқ этилмайди:
—дипломатик ва халқаро ташкилотлар ходимларига;
—расмий (ҳукумат) делегациялар таркибига кирувчи шахсларга;
—республикада инвестиция лойиҳалари доирасида фаолият юритиб келаётган хорижий ташкилотлар ходимларига;
—халқаро юк ташиш билан шуғулланувчи ҳайдовчиларга;
—мамлакатда доимий яшовчи чет эл фуқаролари ва фуқаролиги бўлмаган шахсларга;
—Тожикистон давлатида доимий яшовчи Ўзбекистон фуқароларига;
—ўз юртига қайтаётган Ўзбекистон ва Тожикистон фуқароларига;
—Тожикистонга кетаётган учинчи давлат фуқароларига.
