Жавоҳир Синдоров Ўзбекистонда йилнинг энг яхши шахматчиси бўлди
Шунингдек, ёшлар ва махсус йўналишларда ҳам энг яхшилар аниқланди.
10 январь куни Ўзбекистон шахмат федерацияси томонидан 2025 йил якунлари ва 2026 йилга мўлжалланган режалар юзасидан матбуот анжумани ўтказилди. Тадбирда мамлакатда шахмат тизимини янада ривожлантиришга қаратилган муҳим ташаббуслар эълон қилиниб, йил давомида энг юқори натижа кўрсатган спортчилар ва мутахассислар тақдирланди. Бу ҳақда Ўзбекистон шахмат федерацияси матбуот хизмати хабар берди.
Федерация маълумотига кўра, 2025 йилги FIDE Жаҳон кубоги ғолиби Жавоҳир Синдоров Ўзбекистонда “Йилнинг энг яхши шахматчиси” деб топилди. Аёллар ўртасида эса Ўзбекистон терма жамоаси аъзоси Умида Омонова йилнинг энг яхши аёл шахматчиси сифатида эътироф этилди.
Шунингдек, ёшлар ва махсус йўналишларда ҳам энг яхшилар аниқланди. 12 ёшгача бўлганлар орасида Нурмуҳаммад Нематиллахонов ва Хуснора Хусниддинова, 20 ёшгача бўлганлар орасида Афруза Ҳамдамова ҳамда Муҳиддин Мадаминов ғолиб деб топилди. Пара шахмат йўналишида Марсел Шоюсупов ва Селби Какишева энг яхшилар сифатида тақдирланди.
Бундан ташқари, фахрий шахматчи Ўктам Шералиев, энг яхши ҳакам Комилжон Азизов, шахмат таҳлилчиси Улуғбек Тиллаев ва шарҳловчи Антон Ким алоҳида эътироф этилди. Тадбир якунида барча ғолибларнинг ютуқлари Ўзбекистон шахматининг нуфузи ва келажаги учун муҳим экани алоҳида таъкидланди.
