Жиззах шаҳрида содир бўлган йўл-транспорт ҳодисаси оқибатида вояга етмаган қиз ҳаётдан кўз юмди.
Ижтимоий тармоқларда мазкур ҳодиса акс этган видео тарқалганидан сўнг, Жиззах вилояти Йўл ҳаракати хавфсизлиги бошқармаси матбуот хизмати ҳолат 2025 йил 7 декабрь куни Жиззах шаҳрида содир бўлганини маълум қилди.
Видеоларда пиёдалар ўтиш жойидан йўлни кесиб ўтаётган икки нафар қиздан бирини катта тезликда ҳаракатланган автомобиль уриб юборгани акс этган. Натижада вояга етмаган пиёда оғир тан жароҳатлари олган ва шифохонага ётқизилган.
Шифокорлар кўрсатган тиббий ёрдамга қарамай, жароҳатланган қиз 2025 йил 20 декабрь куни вафот этган.
Дастлабки маълумотларга кўра, ҳодиса ҳайдовчи томонидан йўл ҳаракати қоидаларининг бузилиши оқибатида содир бўлган. Мазкур ҳолат юзасидан Жиноят кодексининг 266-моддаси 2-қисми — транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши — билан жиноят иши қўзғатилган.
Айни вақтда гумон қилинувчи қонунда белгиланган тартибда ушланган. Жиноят иши доирасида дастлабки тергов ҳаракатлари олиб борилмоқда.