Жиззах вилоятида ўтказилган тезкор тадбир давомида одам савдоси билан боғлиқ жиноят фош этилди. Ички ишлар вазирлиги Матбуот хизматининг маълум қилишича, ёш қизни хорижга ноқонуний олиб чиқишга уриниш ҳолати аниқланган. Гумонланувчи танишини Таиландга фоҳишалик билан шуғулланиш учун юбормоқчи бўлган.
Маълум бўлишича, Ғаллаорол туманида яшовчи 19 ёшли қиз Шароф Рашидов туманида истиқомат қилувчи тенгқурини Бангкок шаҳрига боришга кўндирган. У жабрланувчига хорижда юқори даромад топиш, хусусан, фоҳишалик орқали кунига 350–400 доллар ишлаш мумкинлигини айтиб ишонтирган. Шунингдек, сафар билан боғлиқ барча харажатларни ўзи қоплашини билдирган.
12 январь куни Тошкент–Бангкок йўналиши бўйича авиачипталар расмийлаштирилган ва қизлар Тошкент халқаро аэропортига йўл олган. Бироқ улар манзилга етиб бора олмаган. Ҳуқуқ-тартибот идоралари ходимлари томонидан Дўстлик туманидаги «Манас-14» назорат постида гумонланувчилар қўлга олинган.
Текширув давомида қизларнинг мобил телефонлари, хорижга чиқиш паспортлари ва авиачипталари ашёвий далил сифатида расмийлаштирилган. Ҳозирда мазкур ҳолат юзасидан Жиноят кодексининг 135-моддаси 2-қисми (одам савдоси) билан жиноят иши қўзғатилган. Тергов ҳаракатлари давом этмоқда.