Ўзбекистон Журналистлар уюшмаси, Ўзбекистон Ёзувчилар уюшмаси, Кинематография агентлиги, Республика “Тасвирий ойина” ижодий уюшмаси, Бадиий академия, Ўзбекистон Миллий ахборот агентлиги ҳамда Ўзбекистон Миллий телерадиокомпанияси мамлакатимиз мустақиллигининг ўттиз тўрт йиллигига бағишланган “ENG ULUG‘, ENG AZIZ” анъанавий республика кўрик-танловини эълон қилади.
Танловга “Ватан учун, миллат учун, халқ учун!” деган бош ғояни ўзида мужассам этган асарлар ва материаллар қабул қилинади.
“ENG ULUG‘, ENG AZIZ” танлови қуйидаги номинациялар бўйича ўтказилади:
– босма ОАВ ходимларининг энг яхши журналистик ишлари;
– телевидение ва радио ижодкорларининг энг яхши материаллари;
– интернет журналистикаси;
– публицистик жанрдаги энг яхши китоб учун;
– ёзувчи ва шоирларнинг энг яхши бадиий асарлари;
– тасвирий санъат, фото ва дизайн ишлари;
– кино санъати асарлари.
Танловга тақдим этиладиган ижодий ишларга қуйидаги ҳужжатлар илова қилиниши лозим:
– муаллиф ва унинг профессионал фаолияти тўғрисидаги қисқача маълумот (объективка);
– муаллифнинг паспорт ёки ID-карта нусхаси, телефон рақами.
Жамоавий иштирок этувчи ОАВнинг рўйхатдан ўтказилганлигини тасдиқловчи гувоҳнома нусхаси ва ташкилот раҳбарининг паспорт ёки ID-карта нусхаси.
Танловда ҳар бир иштирокчининг 2024 йил 1 августдан 2025 йил 1 августгача босма ва интернет нашрларида эълон қилинган, радио ва телевидениеда эфирга узатилган 5 тадан 7 тагача материаллари жорий йилнинг 15 август кунигача қабул қилинади.
Танлов ғолиблари Ўзбекистон Республикаси давлат мустақиллигининг ўттиз тўрт йиллик байрами арафасида мукофотланади ва уларнинг рўйхати матбуотда эълон қилинади.
Босма ОАВ ходимларининг журналистик ишлари, телевидение ва радио ижодкорларининг материаллари ҳамда интернет журналистикаси бўйича ижодий ишлар “Eng ulug‘, eng aziz” танловига деб кўрсатилган ҳолда Ўзбекистон Журналистлар уюшмасининг (99 466-10-25) рақамига очилган (O‘zbekiston Jurnalistlar uyushmasi) Телеграмига юборилади.