Маҳаллий давлат ҳокимияти органларининг бошқарувдаги ваколатлари кенгайтирилмоқда

 

 

Янги Конституцияга мувофиқ маҳаллий Кенгаш раиси ва ҳоким лавозимларининг бир-биридан ажратилиши уларнинг ваколатларини қайта кўриб чиқишни талаб этди. Шу асосда давлат ва жамият бошқарувидаги ролни кучайтириш мақсадида қатор қонун ҳужжатларига ўзгартириш ва қўшимчалар киритилмоқда.

 

Хусусан, “Ичимлик суви таъминоти ва оқова сувларни чиқариб юбориш тўғрисида”ги Қонун янгиланди. Эндиликда маҳаллий давлат ҳокимияти вакиллик органлари ичимлик суви ва оқова тизимини ривожлантиришга қаратилган ҳудудий дастурларни тасдиқлаш ваколатига эга бўлди.

 

Шунингдек, Қорақалпоғистон Республикаси Жўқорғи Кенгаши, вилоятлар ва Тошкент шаҳар халқ депутатлари Кенгашлари ичимлик суви таъминоти ҳамда оқова сув хизматлари учун тарифларни белгилайди. Бу эса ҳудудий эҳтиёжлардан келиб чиққан ҳолда қарорлар қабул қилиш имконини кенгайтиради.

 

Маҳаллий ижро этувчи ҳокимият органлари эса ушбу соҳада давлат сиёсатини амалга оширишда иштирок этади, ҳудудий дастурларни ишлаб чиқади ва уларнинг бажарилишини таъминлайди. Бундан ташқари, хусусий секторни жалб этиш ва лойиҳалар ижросини мониторинг қилиш ҳам уларнинг вазифалари қаторига киритилган. Мутахассислар ушбу ўзгаришлар ичимлик суви билан таъминлаш бўйича ҳудудий лойиҳаларга инвестицияларни янада самарали жалб этишга хизмат қилишини кутмоқда.