Қозоғистонда хорижликлар учун пулли электрон рухсатнома жорий этилади
Янги тартиб Ўзбекистон фуқароларига ҳам тааллуқли бўлади.
Қозоғистон 2026 йил 1 ноябрдан мамлакатга визасиз кириш ҳуқуқига эга бўлган хорижий фуқаролар учун пуллик электрон кириш рухсатномасини босқичма-босқич мажбурий жорий этади. Бу ҳақда “Медуза” хабар берди.
Янги тартиб Ўзбекистон фуқароларига ҳам тааллуқли бўлади.
Янги Electronic Travel Authorization (ETA) рухсатномаси QazETA рақамли платформаси орқали расмийлаштирилади. Ариза сафардан камида 72 соат олдин топширилиши керак. Рухсатнома 180 кун давомида амал қилади ва шу муддат ичида Қозоғистонга бир неча марта кириш имконини беради.
Рухсатномани QazЕТА орқали расмийлаштириш тўлови 3900 тенге (тахминан 7 евро) бўлиши кутилмоқда. Чегарада расмийлаштирилганда эса тўлов 7800 тенге (тахминан 14 евро)ни ташкил этади.
Янги тартиб босқичма-босқич кучга киради. 1 ноябрдан самолётда Қозоғистонга келадиган хорижликлар учун EТА мажбурий бўлади.
15 ноябрдан автомобиль ёки автобусда Қозоғистоннинг Хитой, Туркманистон ва Ўзбекистон билан чегараларидан кирувчилар учун рухсатнома мажбурий бўлади.
30 ноябрдан талаб Россия ва Қирғизистон билан автомобиль орқали ўтиладиган чегара пунктларига ҳам татбиқ этилади. 15 декабрдан эса Қозоғистонга поезд ва денгиз транспортида келувчилар учун EТА мажбурий бўлади.
Ҳозирча, 25 августдан 1 ноябргача тизим синов режимида ишлайди ва бу даврда чет элликлар рухсатномасиз мамлакатга киритилади.
Қозоғистоннинг расмий QazETA платформасида ETA визасиз режимдаги давлатлар фуқаролари учун мўлжаллангани қайд этилган. Платформада Ўзбекистон ва Қирғизистон фуқароларининг ID-карталари ҳам қабул қилинадиган ҳужжатлар қаторида кўрсатилган.
