Наманганда инсон буйрагини сотмоқчи бўлган шахс ушланди
У буйрак эвазига 4 минг доллар беришни айтган.
Наманган вилоятида инсон буйрагини 4 минг долларга сотмоқчи бўлган шахс ушланди. Бу ҳақда вилоят ИИБ хабар берди.
Қайд этилишича, вилоятнинг Косонсой туманида яшовчи шахс Андижоннинг Булоқбоши туманида яшовчи фуқаро билан гаплашиб, унинг бир буйрагини сотиб беришга келишган.
Келишувга кўра, улар Тожикистонга бориши ва жарроҳлик амалиёти ўша ерда ўтказилиши керак бўлган. У буйрак эвазига $4 минг беришни айтган.
Ушбу шахс фуқарони қалбаки туғилганлик тўғрисидаги гувоҳнома ва бошқа ҳужжатлар билан Тошкентга олиб келаётган вақтида Наманган вилояти ҳуқуқни муҳофаза қилувчи орган ходимлари томонидан қўлга олинган.
Мазкур ҳолат юзасидан Поп тумани ИИБ ҳузуридаги тергов бўлинмаси томонидан Жиноят кодексининг тегишли моддалари билан жиноят иши қўзғатилиб, ҳозирда дастлабки тергов ҳаракатлари олиб борилмоқда.
