“Ўзбекфильм” киноконцернида Россия Федерацияси киноси кунлари доирасида машҳур кинорежиссёр, РСФСР халқ артисти, Россия Федерацияси Кинематографлар уюшмаси раиси Никита Михалков билан ижодий учрашув бўлиб ўтди.
Никита Михалков учрашувда ОАВ вакиллари саволларига жавоб берди.
— Ишонасизми, мен учун яшаш жуда осон. Чунки мен қилган ишимнинг оғирлигини сезмайман. Менда ҳамма нарсани қилиб бўлдим деган ҳис-туйғу йўқ. Шу сабаб, доим ҳаракатдаман.
— Бугунги ёш режиссёрлар ишини қандай баҳолайсиз?
— Бугунги кунда режиссёрлар ишини яхши баҳолаш бироз мушкул. Чунки режиссура соҳасида оқсоқланиш бор. Аввалгидек мукаммал сценарийлар йўқ. Режиссёрлик даражаси актёрликка қараганда анча паст.
Баъзи ёш режиссёрлар афсуски актёрга ёрдам бера олмайди. Чунки улар актёрнинг истеъдодини очиш, унга юқори поғонага кўтарилишига қандай ёрдам беришни билмайди. Режиссёр, энг аввало, механикани билиши керак.
— Илк марта неча ёшингизда роль ижро этгансиз?
— Биринчи марта 1959 йилда, 14 ёшимда Константин Воиновнинг "Қуёш ҳамма учун порлайди" фильмида мактаб ўқувчиси эпизодик ролини ўйнаганман.
— Баъзи машҳур кинорежиссёр ва актёрлар мухлислар билан суратга тушиш ва дастхат беришни исташмайди. Сиз бунга қандай қарайсиз?
— Мен суратга тушиш ва дастхат беришни истамаган ҳамкасбларимни ҳурмат қилмайман. Чунки у йиллар давомида обрў-эътибор учун ўз устида ишлайди. Обрў орттиради ва ниҳоят талантли шахс бўлиб танилгач ўз мухлисларини менсимай қўяди. Мухлислар орасидан топган обрўсини бир сонияда йўқотишга туртки беради. Бу эса санъаткор учун фожиа. Юқоридаги обрўни ушлаб қолишдан кўра унга тирмашиб чиқиш осонроқдир. Иқтидорли одам ўз истеъдодининг устаси эканлигини ҳис қила бошладими шу ҳисни қўйиб юбормасдан дарҳол жиловлай олишни ҳам билиш керак .
— Илк режиссёрлик қилган фильмингиз ҳақида гапириб беринг?
— Тўлиқ метражли ишим "Бегоналар орасидаги яқиним, яқинларим орасидаги бегона" фильми. Унинг сюжети Эдуард Володарский билан ҳамкорликда ёзилган ҳикояга асосланган. Фильмдаги асосий ролларда бирини ўзим ижро этганман. Юрий Богатирев ва Александр Кайдановский ҳам ижро этган. Фильм кўнгилдагидек чиққан.
— Сизнингча замонавий қаҳрамон қандай бўлиши керак?
— Шахсан мен бугунги кунда мустақил қарор қабул қилувчи, раҳм-шафқат ва муҳаббат туйғусини йўқотмаган ҳар қандай шахс замон қаҳрамони бўлиши мумкин, деб ҳисоблайман.
Эслатиб ўтамиз, кинофестиваль бош ҳомийси: AGMK, NGMK va “O‘zbekneftgaz”. Ҳамкор ҳомийлар: “O‘ZBEKTELEKOM”, “O‘zdonmahsulot” AK, “O‘zpromstroybank”ATB, “Ipoteka-bank” ATIB, “Asakabank”AJ, “O‘zbekiston temir yo‘llari”, “Hududgazta’minot”, “UzAuto Motors”AJ, “O‘zmetkombinat” AJ, “Milliy bank”AJ, “Farg’onaazot”AJ, “Eriell”, “Bosch” TM, “Easy Booking”.
Муножат Валиева