Нишон ва Ғузор туманларини боғловчи 5 км масофадаги йўл таъмирланади
“Ўзбекнефтгаз” раиси Абдуғани Сангинов топшириғи билан бир неча юзлаб ишчи-ходимлар фойдаланадиган маршрут хавфсиз ва қулай ҳолга келтирилади.
“Ўзбекнефтгаз” АЖ Бошқаруви раиси Абдуғани Сангиновнинг топшириғига кўра, Нишон ва Ғузор туманларини боғлайдиган 5 км масофадаги абгор йўл тез орада таъмирланади. Бу йўл кўплаб мурожаатларда халқ тилида Грес деб аталадиган "Нуристон" шаҳарчасидан Ғузоргача бўлган қисм сифатида алоҳида қайд этилган эди.
Бошқарув раиси бугун заводларда ишчи-хизматчилар билан бўлиб ўтган самимий мулоқотда йўл муаммосини ижобий ҳал этиш бўйича мутасаддиларга топшириқ берди. Шу орқали йўлни таъмирлаш ишлари тезлаштирилади ва замон талабларига мослаштирилади.
Яқин орада ушбу йўлнинг таъмири бошланиб, бир неча юзлаб “Ўзбекнефтгаз” ходимлари ҳар куни фойдаланадиган маршрут хавфсиз ва қулай ҳолга келтирилади. Компания ижтимоий тармоқлари орқали бу янгиликни эълон қилди.
Шу билан бирга, йўл таъмири минтақадаги транспорт ва ишчи-ходимлар ҳаракатини сезиларли даражада яхшилашга хизмат қилади, ҳудуд аҳолиси ва компания ходимлари учун қулайлик яратади.
