Ўзбекистон Журналистлар уюшмаси Taftish.uz иши юзасидан расмий муносабат билдирди
Taftish.uz интернет нашрининг бирорта вакили Уюшма аъзоси ҳисобланмайди, ҳамда ушбу нашр ходимларининг журналистика соҳаси бўйича мутахассислик маълумотига эгалиги ҳақида Уюшмада маълумот мавжуд эмас.
Ижтимоий тармоқларда Ўзбекистон Журналистлар уюшмаси томонидан Taftish.uz интернет нашри ходимлари иши юзасидан муносабат билдирилмагани ҳақида турли даъволар тарқалди.
Мазкур ҳолат юзасидан Ўзбекистон Журналистлар уюшмаси қуйидагиларни маълум қилди. Аввало, Taftish.uz интернет нашрининг бирорта вакили Уюшма аъзоси ҳисобланмайди. Шунингдек, ушбу нашр ходимларининг журналистика соҳаси бўйича мутахассислик маълумотига эгалиги ҳақида Уюшмада маълумот мавжуд эмас. Қолаверса, Taftish.uz ходимларининг журналист одоби ва касбий этика нормаларига зид хатти-ҳаракатлари бўйича эътирозлар илгари ҳам билдирилган.
Шу билан бирга, Ўзбекистон Журналистлар уюшмаси нафақат ўз аъзолари, балки мамлакатда фаолият юритаётган барча давлат ва нодавлат оммавий ахборот воситалари вакилларининг ҳуқуқ ва қонуний манфаатларини ҳимоя қилиш, уларни қўллаб-қувватлаш борасидаги ишларини изчил давом эттириб келмоқда. Taftish.uz ходимлари билан боғлиқ ҳолат бўйича эса ваколатли органлар томонидан қонунчиликда белгиланган тартибда холис ва ҳуқуқий баҳо берилиши лозимлиги қайд этилди.
Мазкур масала фонида айрим журналистлар томонидан Уюшма фаолиятига нисбатан танқидий фикрлар ҳам билдирилди. Уюшма танқидни қабул қилган ҳолда, у асосли ва холис бўлиши зарурлигини таъкидлади. Шу билан бирга, айрим чиқишларда далилларга асосланмаган, умумий ва субъектив фикрлар илгари сурилгани қайд этилди.
Хусусан, Уюшма томонидан журналистларни бирлаштириш йўлида ишлар олиб борилмаётгани ёки давлат раҳбари томонидан қабул қилинган ҳужжатлар ижроси таъминланмаётгани ҳақидаги даъволар асоссиз экани билдирилди. Уюшма фаолияти Jurnalistlar.uz телеграм канали, ижтимоий тармоқлардаги саҳифалар, «Ҳуррият» газетаси, шунингдек, марказий ОАВ ва телерадиоканаллар орқали мунтазам ёритиб борилмоқда.
Маълумот учун, Уюшма ва унинг ҳудудий бўлимлари томонидан журналистлар ҳамжиҳатлигини мустаҳкамлашга қаратилган қатор тадбирлар ўтказилган. Жумладан, Уюшма кубоги спорт мусобақаларида қарийб 200 нафар, Тошкент вилоятида ташкил этилган уч кунлик республика медиафорумида 100 нафардан ортиқ, Самарқандда ўтказилган минтақавий конференцияда эса тўрт вилоятдан 60 нафарга яқин журналистлар иштирок этган. Бундан ташқари, медиа-турлар, матбуот анжуманлари, устоз журналистлар ҳолидан хабар олиш ҳамда журналистикага оид китобларни тайёрлаш ва чоп этиш ишлари мунтазам амалга оширилмоқда.
Аъзолик масаласига тўхталар экан, Уюшма янги аъзоларни қабул қилиш амалдаги низом ва белгиланган тартиб асосида, журналистларнинг шахсий мурожаати билан амалга оширилишини билдирди. Уюшма томонидан ҳеч ким мажбуран аъзоликка қабул қилинмаслиги таъкидланди.
Уюшма ўз фаолиятида камчиликлар мавжудлигини инкор этмаслигини, бироқ уларни бартараф этиш бўйича зарур чора-тадбирлар мунтазам кўрилаётганини маълум қилди.
Якунда Ўзбекистон Журналистлар уюшмаси мамлакатда фаолият юритаётган барча ОАВ вакилларини Ўзбекистон журналистларининг касб этикаси кодекси ҳамда амалдаги қонунчилик талабларига қатъий риоя қилган ҳолда фаолият юритишга, юрт тинчлиги ва барқарорлиги йўлида жипслашишга чақирди.
Эслатиб ўтамиз, аввалроқ Taftish.uz платформаси ходимлари товламачилик ва фирибгарликда гумонланиб, 27 нафар фуқаро 21 та ҳолат бўйича ушбу медиа платформа ходимларининг ноқонуний ҳаракатларидан жабрланганини билдиргани ҳамда шундан сўнг гумонланувчилар процессуал тартибда ушлангани ҳақида хабар берилган эди.
