Ўзбекистонда исломий банк фаолиятини жорий этишга қаратилган қонунчилик ташаббуси муҳокама қилинди. Олий Мажлис Сенатининг навбатдаги ялпи мажлисида “Ўзбекистонда ислом банк фаолиятини жорий этишга қаратилган айрим қонун ҳужжатларига ўзгартиш ва қўшимчалар киритиш тўғрисида”ги Қонун кўриб чиқилди.
Таъкидланганидек, сўнгги йилларда мамлакатда халқаро тажрибани инобатга олган ҳолда банк тизимини модернизация қилиш, молиявий хизматлар сифатини ошириш ва янги банк инструментларини жорий этиш бўйича изчил ислоҳотлар амалга оширилмоқда. Шу жараёнда ислом молияси тамойилларига мос муқобил банк хизматларини жорий этиш долзарб масалалардан бири сифатида қайд этилди.
Мазкур Қонун билан иккита кодекс ҳамда еттита қонунга ислом банк фаолиятининг ҳуқуқий асосларини мустаҳкамловчи янги нормалар киритилмоқда. Хусусан, ислом банк хизматларини кўрсатиш ҳуқуқини берувчи алоҳида лицензия тури жорий этилиб, унга қўйиладиган талаблар белгиланди. Мазкур лицензия асосида банклар тўлиқ ислом банк фаолиятини ёки анъанавий банк хизматлари билан бир қаторда ислом банк хизматларини ҳам амалга ошириши мумкин бўлади.
Шунингдек, ислом молиявий фаолиятини мувофиқлаштириш мақсадида Марказий банк ҳамда ислом банк хизматларини кўрсатувчи банкларда Ислом молиявий кенгашларини ташкил этиш тартиби ва уларнинг фаолиятига қўйиладиган талаблар белгиланиши назарда тутилган.
Бундан ташқари, ислом молиявий операцияларининг ўзига хос жиҳатларини ҳисобга олган ҳолда Солиқ кодексига алоҳида боб киритилмоқда. Унга мувофиқ, ислом молиявий фаолиятидан олинадиган даромад солиқ мақсадларида фоиз даромадига тенглаштирилади. Шунингдек, банклар ва микромолия ташкилотлари томонидан мижозларга реализация қилинган товарлар бўйича устама қиймат ҚҚСдан озод этилиши белгиланмоқда.
Сенаторлар ушбу Қонун молиявий хизматлар қамровини кенгайтириш, банк-молия секторида рақобатни кучайтириш, шунингдек, янги стратегик инвесторларни жалб этишга хизмат қилишини таъкидлашди.
Муҳокамалар якунида сенаторлар Қонунни маъқулладилар.