Барселонада бўлиб ўтган “МВС Барселона-2023” Жаҳон мобил конгресси доирасида Рақамли технологиялар вазири ўринбосари Жамол Махсудов «НEС» корпорациясининг Бош директор ўринбосари Акиҳико Кумагаи билан учрашув ўтказди.
Учрашув доирасида «Ўзбектелеком» АК ва «НEС» ўртасида телекоммуникация тармоқларини кенгайтириш бўйича истиқболли ва амалга оширилаётган лойиҳалар муҳокама қилинди. Хусусан, «НEС» япон компаниялари билан ҳамкорликда амалга оширилаётган маълумотларни қайта ишлаш маркази лойиҳасига тўхтаб ўтилди ҳамда томонлар лойиҳани муваффақиятли амалга ошириш бўйича фикрлар алмашди.
НEС компанияси Ўзбекистонда Интернет тармоқларини барқарор ўсишини инобатга олган ҳолда «Ўзбектелеком» АКнинг янги тармоқлари ва қўшимча Интернет каналларини ташкил этиш бўйича ўз таклифларини тақдим этди. Жумладан, «НEС» томонидан ҳозирда Ўзбекистонда мавжуд бўлган 600 Гбит/с ўтказувчанлик қобилиятига эга магистраль телекоммуникация транспорт тармоқларини 2025 йилдан бошлаб 2000 Гбит/с ҳажмгача кўпайтириш таклифи берилди.
Учрашувда томонлар мазкур истиқболли лойиҳани амалга ошириш бўйича экспертлар даражасида қўшимча муҳокама қилишга келишиб олишди.