Ўзбекистонда суюлтирилган газ — пропан нархининг ошиши юзасидан Рақобат қўмитаси расмий тушунтириш берди. Қайд этилишича, бозордаги вазият асосан импорт маҳсулот улуши ва унинг нархи ошгани билан боғлиқ. Сўнгги ойларда биржа савдоларида ўртача нархлар айнан импорт пропани ҳисобига шаклланмоқда.
Маълумотларга кўра, 2025 йилда биржа орқали жами 358 минг тонна суюлтирилган газ сотилган бўлиб, унинг 61 фоизи маҳаллий, 39 фоизи импорт маҳсулот ҳиссасига тўғри келган. Бироқ август ойидан бошлаб ички бозорда маҳаллий маҳсулот улуши кескин камайган: 2025 йил декабрида 35 фоизга, 2026 йил январь ойининг ўтган қисмида эса 10 фоизгача тушиб кетган. Бунга маҳаллий газнинг асосан аҳоли ва ижтимоий соҳа объектларига йўналтирилгани сабаб бўлган.
Рақобат қўмитаси маҳаллий пропан нархи деярли ўзгармаганини таъкидлайди. Белгиланган чекловлар сабабли маҳаллий маҳсулот биржада 1 тоннаси 7 миллион сўмдан ошмаган. Импорт пропан эса аввал 8 миллион сўмгача шаклланган бўлса, ҳозирда тадбиркорлар томонидан бошланғич нархлар оширилгани сабаб ўртача 9–9,5 миллион сўмгача етган. Бу декабрь ойига нисбатан қарийб 20 фоиз ўсиш демакдир.
Қўмита ёқилғи қуйиш шохобчаларидаги чакана нархлар бўйича доимий мониторинг олиб борилаётганини билдирган. Айни пайтда пропанда ҳаракатланувчи автомобиллар умумий транспорт воситаларининг 11 фоизини, ушбу ёқилғининг умумий реализациядаги улуши эса атиги 5 фоизни ташкил этади. Расмийлар ижтимоий тармоқларда нархлар бўйича асоссиз ахборот тарқатиш бозор мувозанатини бузиши мумкинлигини айтиб, фуқароларни бундай хабарлардан тийилишга чақирди.