Аввалроқ Ўзбекистонда «Боботоғ» божхона пункти, «Учтурғон» чегара божхона пости, «Поп» чегара божхона пости, «Ровот» чегара божхона пости, «Риштон» чегара божхона пости, “Бекобод авто” чегара постлари фаолияти тугатилиши мумкинлиги ҳақида хабарлар тарқалган эди.
Унга кўра, жорий йилдан бошлаб мазкур чегара ўтказиш пунктларида синов тариқасида автотранспорт воситаларини кўздан кечириш ишлари фақат чегара қўшинлари томонидан амалга оширилади.
Шунингдек, Масофавий электрон декларациялаш (МEД) тизими фаолияти қайта ташкил этилади. Жумладан, Андижон, Бухоро, Наманган, Самарқанд, Тошкент ва Фарғона вилоятларидаги МEД божхона постлари фаолияти тўхтатилади.
Тугатилаётган божхона постларининг штат бирликлари “Божхона расмийлаштируви маркази”га, шунингдек иш ҳажми юқори бўлган бошқа божхона постларига ўтказилиши белгиланган.
Мазкур хабарлар юзасидан Zamon.uz нашри Божхона қўмитаси матбуот котиби Ҳусан Тангриев билан боғланди. Унинг маълум қилишича, Ўзбекистон Республикаси Президентининг жорий йил 17 декабрдаги ПФ–250-сонли “Божхона маъмуриятчилиги ва ташқи савдо тартиботларини янада соддалаштириш ҳамда самарадорлигини ошириш чора-тадбирлари тўғрисида”ги Фармонига мувофиқ, 6 та божхона пости ва пунктида синов тариқасида 2026 йил 31 декабрга қадар автотранспорт воситаларини кўздан кечириш ишлари чегара қўшинлари томонидан амалга оширилиши белгиланган.
Бу эса мазкур божхона постлари тугатилишини англатмайди. Аксинча, бир-бирини такрорловчи функцияларни қисқартириш ҳисобига айрим божхона назорати тартиб-таомилларининг чегара қўшинларига ўтказилишини назарда тутади.
Шу муносабат билан Божхона қўмитаси жамоатчиликни нотўғри ва тасдиқланмаган хабарлар билан чалғитмасликка чақирди.
Таъкидланишича, мазкур чегара божхона постлари ўз фаолиятини давом эттиради.