Учтепа тумани прокурори ёрдамчиси 15 минг доллар олиб, қочишга уринган пайтида қўлга олинди
У иккита уйнинг ертўла қисмини ижарага бериш эвазига тадбиркордан пул талаб қилган.
Давлат хавфсизлик хизматининг Тошкент шаҳар бўйича бошқармаси ходимлари томонидан ўтказилган тезкор тадбирда, 2025 йилнинг сентябрь ойига қадар Шайхонтоҳур туманида прокурор ёрдамчиси лавозимида ишлаган, ҳозирда Учтепа туманида шу лавозимни эгаллаган шахс хизмат мавқеидан фойдаланиб, якка тартибдаги тадбиркорга Шайхонтоҳур туманида жойлашган 2 та уйнинг ертўла қисмидаги нотурар майдонларни ижарага олиб берганлигини рўкач қилиб, ундан 15 минг АҚШ долларини ўзига тегишли автомашинада олиб, ҳодиса жойидан қочишга уринган вақтида ашёвий далиллар билан ушланди. Бу ҳақда ДХХ Zamon.uz'га хабар берди.
Ҳозирда ушбу ҳолат бўйича Тошкент шаҳар прокуратураси томонидан прокурор ёрдамчисига нисбатан Жиноят кодексининг 168-моддаси (фирибгарлик) 3-қисми «в» банди билан жиноят иши қўзғатилиб, унга нисбатан «қамоқ» эҳтиёт чораси қўлланилган.
