Термиз – Истанбул, Термиз – Дубай йўналишларида янги рейслар қўйилади
Афғонистон ва Тожикистон билан боғлайдиган 178 км магистраль йўл капитал таъмирга киради.
Президент Шавкат Мирзиёев раислигидаги Сурхондарё вилоятини йўл ва транспорт инфратузилмаси жиҳатидан ривожлантириш бўйича йиғилишида транспорт масалаларини ҳудуднинг энг оғриқли муаммоларидан бири экани қайд этилди.
Икки йил олдин Осиё тараққиёт банки билан 183 миллион доллар ҳисобига Бойсун ва Деновни боғловчи йўлнинг 111 километр қисмини цемент-бетон қопламага ўтказиш лойиҳаси бошланган. Бу йўл ишга тушса, юк ташиш ҳажми икки баравар ошади ва вақт 3 соатдан 1,5 соатга қисқаради.
Ўзбекистонни Афғонистон ва Тожикистон билан боғлайдиган 178 километрли магистраль йўл 30 йилдан буён капитал таъмирланмаган. Мутасаддиларга қурилиш ишларини уч ой ичида бошлаш топширилди.
Тошкент–Термиз йўналишидаги йўловчи поезди 14 соатдан кўп ҳаракатланади. Кореялик ҳамкорлар билан замонавий тезюрар поездлар олиб келиш бўйича келишувга эришилган. «Тошғузор–Бойсун–Қумқўрғон» участкасини тезюрар поездга мослаш бўйича лойиҳа шу йил бошланади, 103 километр бўлган «Қумқўрғон–Қудуқли» темир йўлини электрлаштириш ишларига киришилади.
Йиғилишда Термиз–Истанбул ва Термиз–Дубай йўналишларида янги рейслар қўйилиши белгиланди. Шўрчи, Денов, Сариосиё, Шеробод ва Бойсундан кунига 100 минг одам вилоят марказига енгил машинада келиб-кетмоқда. Сурхондарёга олиб келинаётган 125 та автобус биринчи навбатда ушбу йўналишларга йўналтирилади.
