Бухорода “Халқ банки” мансабдори, Сирдарёда МЧЖ менежери пора билан қўлга тушди
Кредит ва уй-жой субсидияси сохталаштирилиши бўйича жиноят ишлари қўзғатилди.
Давлат хавфсизлик хизмати ва Иқтисодий жиноятларга қарши курашиш департаменти ҳамкорлигида Бухоро ва Сирдарё вилоятларида мансабдор шахсларнинг фирибгарлик ҳаракатлари фош этилди. Бу ҳақда ДХХ Zamon.uz'га хабар берди.
Бухоро вилоятида АТ “Халқ банки” Ромитан шаҳридаги стандарт банк хизматлари маркази шоъба мудири хизмат мавқесидан фойдаланган ҳолда бошқа тижорат банкида иш олиб борувчи танишлари орқали 800 млн сўм миқдоридаги кредит маблағини ажратиш эвазига 2 000 АҚШ доллари талаб қилган. Тезкор тадбир давомида у 1 000 АҚШ долларини учинчи шахс орқали олган вақтида ушланган. Мансабдор шахсга нисбатан Жиноят кодексининг 25, 168-моддаси 3-қисми «в» банди ва 28, 192 прим 9-моддаси 1-қисми билан жиноят иши қўзғатилган, тергов ҳаракатлари олиб борилмоқда.
Сирдарё вилоятида кузатилган ҳолатда эса, тадбиркорлик субъектларига микроқарзлар бериш билан шуғулланувчи МЧЖнинг Гулистон шаҳар филиали менежери ўзининг ҳокимият тизимидаги мансабдор танишлари орқали, Оқолтин туманида яшовчи фуқарога имтиёзли равишда уй-жой олиши учун субсидия маблағи ажратилишида ёрдам бериш эвазига 8 минг АҚШ доллари талаб қилган ва 96 млн сўм олган вақтида ДХХ ва ИЖҚКД ходимлари томонидан ушланган. Унга нисбатан Жиноят кодексининг 168-моддаси 2-қисми «а» банди ва 28, 211-моддаси 1-қисми билан жиноят иши қўзғатилиб, «қамоқ» эҳтиёт чораси қўлланилди.
Ҳозирда ҳар икки ҳолат бўйича тергов ҳаракатлари давом этмоқда.
