Ўзбекистонда «Спутник V» вакцинасини кейинги ҳафтадан ишлаб чиқариш бошланади
Ўзбекистонда Jurabek Laboratories компанияси томонидан ишлаб чиқарилган «Спутник V» вакцинаси Россиянинг Гамалея илмий-тадқиқот маркази томонидан маъқулланди. Россиядан кейинги ҳафтада хом-ашё келганидан сўнг, препарат ишлаб чиқарилади ва текширув учун яна марказга юборилади.
Jurabek Laboratories компанияси томонидан ишлаб чиқилган «Спутник V» вакцинаси Гамалея илмий-тадқиқот маркази томонидан маъқулланди. Бу ҳақда компаниянинг ишлаб чиқариш директори Фаррух Лутфуллаев маълум қилди.
Унинг таъкидлашича, ҳозирда компания Россиядан хом-ашё келишини кутмоқда. «Кейинги ҳафта сешанба ёки чоршанба куни келиб қолиши керак. Келиши билан ишлаб чиқаришни бошлаймиз», — деди Лутфуллаев.
Вакциналар ишлаб чиқарилганидан сўнг, уларнинг ҳар бир сериясидан наъмуналар яна Россияга текширув учун юборилади. Гамалея илмий-тадқиқот маркази ушбу наъмуналарни маъқуллаганидан сўнггина, вакциналар эмлаш учун етказиб берилади.
Яъни, кейинги ҳафтада ишлаб чиқариладиган вакциналар фақат август охирига келиб етказиб берилиши мумкин.
Фаррух Лутфуллаевнинг маълум қилишича, ҳозирга қадар давлат томонидан компанияга 2 млн доза миқдорида «Спутник V» вакцинасини ишлаб чиқаришга буюртма берилган. «Уларнинг 1 млн дозаси биринчи компонент, яна 1 млн дозаси иккинчи компонент учун бўлади», — деди у.
