Ўзбекистонда сунъий интеллектга асосланган «ақлли» миграция назорат пунктларини жорий этиш бўйича янги тизим синовдан ўтказилади. Бу ҳақда Адлия вазирлиги хабар берди.
Маълум қилинишича, 2026 йил 1 майдан бошлаб республикада ўз-ўзига хизмат кўрсатишга мўлжалланган, сунъий интеллект технологияларига асосланган иммиграция назорат пунктлари босқичма-босқич ишга туширилади. Синов тариқасида дастлабки назорат пунктлари Тошкент шаҳри, Самарқанд ва Фарғона вилоятлари ҳамда Қорақалпоғистон Республикасида ташкил этилади.
Мазкур инновациянинг асосий мақсади миграция соҳасини рақамлаштириш, инсон омилини камайтириш ва бюрократик тартиб-таомилларни соддалаштиришдан иборат. Ички ишлар вазирлиги ушбу пунктлар орқали фуқаролар ва хорижий шахсларга кўрсатиладиган хизматлар турини босқичма-босқич кенгайтиришни режалаштирмоқда.
Шунингдек, 2026 йил май ойидан бошлаб Миграция департаменти ва унинг ҳудудий бўлинмаларига электрон кириш визаларини бир марталик тарзда 30 кунгача узайтириш ваколати берилади. Бундан ташқари, ушбу органлар хорижий фуқароларга ишлаш учун рухсатнома бериш ҳуқуқига эга бўлиб, бу меҳнат бозорида мутахассисларни қонунийлаштириш жараёнини тезлаштиради.
Талабалар учун ҳам қулайликлар жорий этилади. Хусусан, 2026 йил 1 сентябрдан бошлаб талабалар ётоқхона билан шартнома тузгач, яшаш жойи бўйича рўйхатдан ўтиш жараёни автоматик тарзда амалга оширилади.