Перу ҳукумати мамлакат пойтахти Лима ва унга туташ Каллао шаҳрида 30 кунлик фавқулодда ҳолат эълон қилди. Бу ҳақда Reuters, AP News ва Al Jazeera нашрлари хабар берди.
Президент Хосе Жери 22 октябр куни имзолаган фармонга кўра, фавқулодда ҳолат жиноятчилик даражасининг кескин ошгани сабабли жорий этилган. Ҳужжатга биноан, бу давр мобайнида фуқароларнинг тўпланиш ва ҳаракатланиш эркинлиги чекланади, шунингдек, кўча патруллари вақтида армияга кенгроқ ваколатлар берилади.
Расмий маълумотларга кўра, жорий йилда Лимада 1600 дан ортиқ қотиллик содир этилган — бу ўтган йилги кўрсаткичлардан анча юқори. Полиция мамлакатда фаолият юритаётган қуролли жиноий гуруҳлар, айниқса, наркотрафик ва ўғирлик билан шуғулланувчи тўдаларга қарши кенг кўламли операциялар бошлашини маълум қилган.
Фавқулодда ҳолат эълон қилиниши ортидан пойтахт кўчаларида қўшимча ҳарбий бўлинмалар жойлаштирилди. Ҳукумат жиноятчиликка қарши қатъий чора кўриш зарурлигини таъкидласа-да, инсон ҳуқуқлари ташкилотлари бу қарорни танқид қилди. Улар фикрича, аввалги йилларда ҳам шундай чоралар кўрилган, аммо бу жиноятчилик даражасини сезиларли даражада камайтирмаган.
Эслатиб ўтамиз, Перу сўнгги йилларда сиёсий беқарорлик, иқтисодий муаммолар ва ижтимоий норозиликлар билан юзлашиб келмоқда. Мутаҳассислар фикрича, Лимадаги вазиятни барқарорлаштириш учун ҳарбий кучдан ташқари ижтимоий ва иқтисодий ислоҳотлар ҳам талаб этилади.