Ўзбекистон Республикаси Президенти Шавкат Мирзиёев Давос шаҳрига амалий ташрифи доирасида дунёдаги энг йирик инвестиция компанияларидан бири — “BlackRock” компанияси директорлар кенгаши аъзоси ва катта бошқарувчи директори Адебаё Огунлеси билан учрашув ўтказди. Мулоқот чоғида икки томонлама инвестициявий ҳамкорликни ривожлантириш истиқболлари муҳокама қилинди.
Учрашувда “BlackRock” билан илгари эришилган келишувларни амалиётга татбиқ этиш, шунингдек, ҳамкорликнинг устувор йўналишларини аниқлаб олиш масалаларига алоҳида эътибор қаратилди. Президент Ўзбекистон очиқ ва узоқ муддатли инвестицияларга тайёр эканини таъкидлади.
Томонлар компаниянинг Ўзбекистондаги муҳим иқтисодий ва инфратузилмавий лойиҳаларда иштирок этиш имкониятлари юзасидан фикр алмашдилар. Хусусан, «БласкРоск»нинг мамлакатдаги айрим корхоналар капиталига кириши ва қўшма инвестиция механизмларини йўлга қўйиш ташаббуслари муҳокама қилинди.
Шунингдек, Ўзбекистоннинг инвестиция муҳитини янада яхшилаш мақсадида халқаро экспертиза ва илғор тажрибани жалб этиш масалалари қўллаб-қувватланди. Учрашув якунида томонлар ўзаро манфаатли ҳамкорликни чуқурлаштириш ва аниқ лойиҳалар бўйича ишлашни давом эттиришга келишиб олдилар.