Президент Шавкат Мирзиёев Янги Тошкент ҳудудида олиб борилаётган бунёдкорлик ва инфратузилма лойиҳалари билан танишди.
Давлат раҳбари дастлаб ер ости автотураргоҳи ва пиёдалар ўтиш йўлаги қурилиши жараёнини кўздан кечирди. Умумий қурилиш майдони 40 минг квадрат метр бўлган, қиймати 100 миллион АҚШ долларини ташкил этувчи ушбу автотураргоҳнинг биринчи босқичида 200 та енгил автомобиль, шунингдек, 30 та мототцикл ва скутерни жойлаштириш имконияти яратилади. Пиёдалар учун қулай ва хавфсиз ҳаракатланишни таъминлаш мақсадида тўрт йўналишли ўтиш йўлаги барпо этилади.
Мазкур мажмуада автоматлаштирилган парковка тизимлари, велосипед ижараси нуқталари, шунингдек, электромобилларни қувватлантириш станциялари ташкил этилиши режалаштирилган. Автотураргоҳни 2026 йилда фойдаланишга топшириш кўзда тутилган.
Президентимиз замонавий автотураргоҳлар сонини кўпайтириш, уларни аҳоли учун максимал даражада қулай қилиш, шунингдек, келгусида электромобиллар улуши ошишини инобатга олиб, уларни қувватлаш инфратузилмасини изчил ривожлантириш бўйича тегишли топшириқлар берди.
Шунингдек, Янги Тошкент ҳудудида вазирлик ва идоралар фаолиятини ташкил этиш учун маъмурий бинолар қурилиши олиб борилмоқда. Хусусан, Қурилиш ва уй-жой коммунал хўжалиги вазирлиги учун модул турдаги янги бино фойдаланишга топширилган.
1,4 гектар ер майдонида жойлашган, умумий майдони 5751 квадрат метр бўлган мазкур мажмуа 5 та бир қаватли, енгил металл конструкцияли, базальт қопламали сендвич панеллардан барпо этилди. Ушбу бино вазирликнинг марказий аппарати ва тизим ташкилотларини бир жойда жамлаб, ўзаро ҳамкорлик ҳамда иш жараёнларининг самарадорлигини оширишга хизмат қилади.
Энергия тежамкор қурилиш материаллари, мустақил оқова тизими, марказлашган иситиш, совитиш ва шамоллатиш тизимлари бино эксплуатация харажатларини камайтиради, шунингдек, келгусида кенгайтириш ёки демонтаж қилиш имконини беради.
Айни пайтда мазкур бинода 550 нафар ходим фаолият юритмоқда. Бу ерда, шунингдек, вазирлик ҳузуридаги Ахборот-коммуникация технологияларини ривожлантириш республика маркази ҳам жойлашган.
Давлатимиз раҳбарига марказ томонидан “Шаффоф қурилиш” миллий ахборот тизими асосида ишлаб чиқилган платформалар тақдим этилди. Жумладан, Давлат шаҳарсозлик кадастри географик ахборот тизими орқали шаҳар ва туманларнинг ижтимоий-иқтисодий маълумотлари ягона рақамли базага жамланган. Геопортал орқали аҳоли пунктларининг 3Д форматдаги рақамли эгизаклари яратилган, реконструкция ва реновация зоналари белгиланган ҳамда ҳудудларни комплекс таҳлил қилиш имконияти яратилган.
Бош режаларни ишлаб чиқиш, жамоатчилик муҳокамаси ва қурилишга рухсат бериш жараёнлари тўлиқ рақамлаштирилган. Бугунги кунга қадар 20 та шаҳар, 22 та шаҳарча ва 843 та аҳоли пунктининг рақамли бош режалари ишлаб чиқилиб, геопорталга жойлаштирилган.
Шунингдек, «Рейтинг», «Тендер», “Қурилиш соҳасида давлат хизматлари”, “Лойиҳа-смета ҳужжатлари экспертизаси”, “Қурилишда давлат назорати”, “Менинг уйим”, “Менинг ҳудудим” ва иссиқлик таъминоти биллинг тизими каби платформалар фаолият юритмоқда.
Тизимни янада такомиллаштириш ва шаффофликни кучайтириш юзасидан масъулларга топшириқлар берилди.
Шунингдек, Президент ёш мутахассислар билан суҳбатлашиб, замонавий билимлар ва ахборот технологияларини чуқур эгаллашнинг аҳамиятини алоҳида таъкидлади.