Пропан нархларини барқарорлаштиришга қаратилган чоралар натижасида биржа савдоларида ушбу ёқилғи тури бўйича ўртача нархлар 9,3 млн сўмдан 7,8 млн сўмгача пасайди. Бу 18 фоизлик арзонлашувни англатади. Бу ҳақда Рақобат қўмитаси матбуот хизмати суюлтирилган газ реализацияси юзасидан расмий маълумот берди.
Қўмитанинг маълум қилишича, 2025 йил ноябрь–декабрь ойларида ҳамда жорий йилнинг январ ойида пропаннинг биржа савдоларида бошланғич нархларни асоссиз ошириш, шунингдек, маҳсулот ҳажмларини сунъий равишда савдоларга чиқармаслик орқали рақобатга зид бўлган мувофиқлаштирилган ҳаракатлар аломатлари аниқланган.
Мазкур ҳолатлар юзасидан 92 та импорт қилувчи хўжалик юритувчи субъектга нисбатан монополияга қарши иш қўзғатилган. Жумладан:
- Қорақалпоғистон Республикаси — 5 та,
- Андижон вилояти — 7 та,
- Бухоро вилояти — 3 та,
- Фарғона вилояти — 13 та,
- Наманган вилояти — 4 та,
- Қашқадарё вилояти — 5 та,
- Самарқанд вилояти — 17 та,
- Сирдарё вилояти — 4 та,
- Тошкент шаҳри — 21 та,
- Тошкент вилояти — 1 та,
- Хоразм вилояти — 12 та субъект.
Шунингдек, Рақобат қўмитаси чакана савдода пропан нархларининг асоссиз ошиб кетишининг олдини олиш мақсадида ёқилғи қуйиш шохобчаларида доимий мониторинг олиб борилаётганини билдирди.
Аввалроқ Рақобат қўмитаси метан гази нархларинини асоссиз ошириш бўйича иш қўзғатгани хабар қилинган эди.